Një konflikt që dyshohet se ka nisur për motive xhelozie përfi në një përleshje të dhunshme me thika në Treviglio të Italisë. Një 35-vjeçar me origjinë marokene mbeti i plagosur rëndë, ndërsa një 22-vjeçar shqiptar u arrestua dhe akuzohet për tentativë vrasjeje.
Ngjarja ndodhi të enjten mbrëma, rreth orës 22:00, pranë stacionit të trenit. Dy personat zbritën nga i njëjti tren dhe nisën të debatonin, ndërsa përplasja u përshkallëzua më pas në dhunë fizike.
Sipas hetimeve, konflikti vijoi pak më vonë në një parkim pranë bulevardit Vittorio Veneto dhe xhamisë. 22-vjeçari dyshohet se ndoqi 35-vjeçarin, i armatosur me dy thika, dhe e goditi në krah dhe në shpinë.
Disa dëshmitarë, që ndodheshin në zonë, njoftuan menjëherë ambulancën. I plagosuri u dërgua në spitalin e Treviglios në gjendje të rëndë. Gjendja e tij më pas u stabilizua, por ai vijon të jetë i shtruar me prognozë të rezervuar.
Karabinierët kanë sekuestruar një thikë me teh të palosshëm dhe po analizojnë pamjet e kamerave të sigurisë për të rindërtuar ngjarjen.
22-vjeçari ka pranuar se e ka goditur me thikë 35-vjeçarin, por pretendon se ka vepruar në vetëmbrojtje. Hetuesit dyshojnë se në qendër të konfliktit mund të jetë një lidhje sentimentale.
I riu pritet të dalë të hënën para gjyqtarit për hetimet paraprake, në seancën për vleftësimin e arrestit.