Profili zyrtar i Robin Williams në Instagram është rikthyer në aktivitet, 12 vjet pas vdekjes së aktorit dhe komedianit amerikan. Vendimi është marrë nga tre fëmijët e tij, Zak, Cody dhe Zelda Williams, në prag të 75-vjetorit të lindjes së tij.
Në mesazhin e parë të publikuar pas një periudhe të gjatë heshtjeje, familja shpjegon se qëllimi është ta kthejë profilin në një arkiv të besueshëm të jetës dhe karrierës së Williams. Fansat do të mund të rikthehen aty te fotografitë, videot, historitë dhe momentet që lidhen me aktorin.
Fëmijët e tij kanë theksuar gjithashtu rëndësinë e faktit që puna e Robin Williams vazhdon të zbulohet nga breza të rinj, ndërsa ata që e ndoqën gjatë karrierës së tij mund të rikthehen te kujtimet e krijuara prej humorit dhe roleve të tij.
Williams vdiq në vitin 2014, në moshën 63-vjeçare. Ai kishte vuajtur nga demenca me trupa Lewy, një sëmundje neurodegjenerative që mund të shkaktojë ndryshime në funksionet njohëse, lëvizje dhe sjellje. Vdekja e tij u cilësua si vetëvrasje.
Gjatë viteve ’80 dhe ’90, Williams u shndërrua në një prej figurave më të njohura të kinemasë amerikane. Mes roleve që përcaktuan karrierën e tij janë profesori John Keating në Shoqëria e poetëve të vdekur, Daniel Hillard në Zonja Doubtfire dhe Sean Maguire në Will Hunting, rol për të cilin fitoi Oscar.
Pas vdekjes së tij, llogaritë e Williams në rrjetet sociale mbetën kryesisht joaktive. Rikthimi i profilit në Instagram vjen në një moment kur familja e tij ka qenë veçanërisht e kujdesshme ndaj mënyrës se si imazhi i aktorit përdoret online.
Në fund të vitit 2025, Zelda Williams reagoi publikisht ndaj videove të krijuara me inteligjencë artificiale që përdornin imazhin e të atit. Ajo kërkoi që imazhi i tij të mos shfrytëzohej në këtë mënyrë.
Tani, profili i rikthyer në Instagram pritet të funksionojë si një hapësirë e kontrolluar nga familja, me fokus te materiali autentik dhe kujtimet që lidhen me jetën dhe veprën e Robin Williams.