Një studim i ri nga Universiteti Queen’s në Belfast, Irlandë, tregon se shtimi i manaferrave, verës së kuqe, patëllxhanëve dhe rrushit në dietë mund të ndihmojë në përmirësimin e shëndetit të zemrës. Diabeti shpesh është i pranishëm në familje, duke kaluar zakonisht nga nëna te djali, te mbesa, te stërnipi e kështu me radhë.Lexo edhe:Një multivitaminë e përditshme mund t’i ndihmojë të moshuarit të qëndrojnë aktivë Por, edhe pse kjo sëmundje mund të trashëgohet, ajo nuk është e pashmangshme, madje as te ata që kanë predispozitë gjenetike. Ushqyerja e shëndetshme dhe mbajtja nën kontroll e kolesterolit; të qenit në formë fizike dhe ruajtja e saj; shmangia e stresit sa herë që është e mundur; si dhe konsumimi vetëm herë pas here i disa gotave birrë ose vere – të gjitha këto janë lidhur me një rrezik më të ulët për shfaqjen e diabetit. Dieta mesdhetare me vajin e ullirit në qendër të saj – është lidhur gjerësisht me uljen e mundësisë së zhvillimit të diabetit. Sipas nutricionistëve nga Universiteti Queen’s në Belfast (QUB), Universiteti Tufts në Boston dhe Universiteti i Anglisë Lindore, patëllxhanët, manaferrat, rrushi dhe vera e kuqe duhet të jenë pjesë e menusë së kujtdo që shqetësohet për diabetin. Produktet e përmendura janë të pasura me antocianina. Ato jo vetëm që u japin manaferrave dhe rrushit ngjyrat e tyre të thella dhe të ndritshme, por, si pjesë e familjes së flavonoideve, veprojnë edhe si substanca anti-inflamatore, duke mbrojtur qelizat nga dëmtimet që shkakton plakja. Antocianinat “mbështesin shëndetin e enëve të gjakut dhe mund të ndihmojnë në ruajtjen e niveleve të glukozës dhe insulinës”, thuhet në një njoftim për shtyp të QUB-së, me rastin e publikimit të studimit në revistën The American Journal of Clinical Nutrition. Në artikullin e tyre shkencor, studiuesit thonë se kanë gjetur “prova gjithëpërfshirëse dhe të unifikuara që mbështesin përfshirjen e antocianinave në udhëzimet ushqimore të bazuara në prova për parandalimin e sëmundjeve kardiovaskulare (CVD).” “Studimi ynë tregon përmirësime klinikisht të rëndësishme në qarkullimin e gjakut, elasticitetin e arterieve dhe nivelet e insulinës në të dhënat e kombinuara të provave klinike, dhe këto përmirësime mund të përkthehen në përfitime të rëndësishme afatgjata për shëndetin,” tha Aedin Cassidy, biologe dhe studiuese e ushqyerjes në QUB. Më herët gjatë këtij viti, studiues nga Universiteti i Bonit në Gjermani shpjeguan se kishin prova se qulli i tërshërës (porridge ose oatmeal) jo vetëm që është një mëngjes i ngrohtë dhe i ushqyeshëm për dimër, por ka edhe potencial për të ndihmuar në parandalimin e diabetit. Ndërsa në nëntor të vitit 2025, një ekip nga King’s College London deklaroi se njerëzit që konsumojnë rregullisht ushqime të pasura me polifenole, si manaferrat, “mund të kenë shëndet më të mirë të zemrës në afat të gjatë.” Një vit më parë, Shoqata Amerikane e Mjekësisë (AMA) publikoi gjetjet e shkencëtarëve nga Spanja dhe SHBA, të cilët thanë se kishin vërejtur një “zvogëlim të vdekshmërisë së tepërt” te personat e moshuar që pinin vetëm verë dhe e konsumonin atë gjatë vakteve. Hapi i radhës, sigurisht, do të ishte rekomandimi për t’i shtuar boronicat dhe mjedrat në tasin me qull të tërshërës për ta nisur ditën, ndërsa gota – ose edhe dy a tre – me verë mund të presë deri në darkë. Ose, të paktën, deri në drekë./DPA News
