Përdorimi i cigareve elektronike në prani të fëmijëve rrit rrezikun e krizave të astmës po aq sa tymi i cigareve të zakonshme, sipas një studimi të ri amerikan. Gjetjet sfidojnë bindjen e përhapur se cigaret elektronike janë një alternativë më e sigurt për shëndetin e fëmijëve. Studiuesit analizuan të dhënat elektronike shëndetësore nga më shumë se 48 000 vizita në klinika pediatrike, gjatë një periudhe prej 33 muajsh. Në studim u përfshinë fëmijë të paktën një vjeç, të diagnostikuar me astmë, prindërit e të cilëve raportuan përdorimin e duhanit ose cigareve elektronike në shtëpi.Lexo edhe:Një dozë e vetme e një substance që shkakton halucinacione ndihmon në uljen e simptomave të depresionit Rezultatet treguan se fëmijët e ekspozuar ndaj tymit të duhanit dhe avujve të cigareve elektronike kishin problemet më të mëdha me kontrollin e astmës. Ata përjetonin më shumë kriza, simptoma gjatë natës dhe gjatë aktivitetit fizik, përdornin më shpesh inhalatorët për lehtësimin e simptomave dhe kishin më shumë shtrime në spital. Ekspozimi vetëm ndaj tymit të duhanit kishte efekte më të kufizuara. Megjithatë, edhe përdorimi vetëm i cigareve elektronike në shtëpi lidhej në mënyrë të pavarur me më shumë kriza astme dhe simptoma gjatë aktivitetit fizik. Drejtuesi i studimit, Brian Jenssen, profesor i asociuar i pediatrisë në Spitalin e Fëmijëve të Filadelfias, theksoi se nuk ekziston një nivel i sigurt ekspozimi ndaj duhanit apo cigareve elektronike për fëmijët. Ai u bëri thirrje prindërve dhe kujdestarëve që përdorin produkte duhani ose nikotine të përpiqen t’i lënë ato, duke kërkuar ndihmë përmes këshillimit dhe trajtimeve të provuara. Studiuesit rekomandojnë që mjekët pediatër të kontrollojnë ekspozimin e fëmijëve ndaj të gjitha formave të duhanit dhe nikotinës, jo vetëm ndaj cigareve tradicionale, dhe t’u ofrojnë prindërve mbështetje për ta ndërprerë përdorimin e tyre. /SF Weekly – Syri.net
