Një studim i publikuar së fundmi ka rikthyer debatin rreth ndikimit të pijeve të nxehta në shëndet, veçanërisht kafesë dhe çajit. Sipas të dhënave të studimit, konsumimi i rregullt i pijeve me temperaturë mbi 65 gradë Celsius lidhet me një rrezik rreth tri herë më të lartë për zhvillimin e kancerit të ezofagut, krahasuar me pijet më të ftohta.Lexo edhe:Temperaturat deri në 27 gradë, ja si do të jetë moti sot Shkencëtarët besojnë se temperaturat shumë të larta mund të dëmtojnë qelizat në pjesën e sipërme të ezofagut. Kjo mund të jetë një lajm më pak i mirë për adhuruesit e kafesë së zezë, pasi një filxhan kafeje shpesh shërbehet në temperatura rreth 65 deri në 70 gradë Celsius. Ndërkohë, çaji i konsumuar me pak qumësht zakonisht ka një temperaturë më të ulët, afërsisht 57 gradë Celsius. Megjithatë, studimi i Universitetit të Oxfordit është vetëm një nga shumë kërkimet që janë përpjekur të zbulojnë nëse çaji apo kafeja është më e dobishme për shëndetin. Të dyja pijet janë lidhur me përfitime të mundshme për zemrën, trurin dhe kontrollin e peshës. Por cila prej tyre del më mirë? Zemra: Çaji duket se ka avantazh Sëmundjet kardiovaskulare prekin miliona njerëz dhe si kafeja, ashtu edhe çaji, janë studiuar për efektet e mundshme mbrojtëse ndaj zemrës. Kafeja përmban polifenole, veçanërisht acide klorogjenike, të cilat mund të ndihmojnë në mbrojtjen e enëve të gjakut. Dietologia Ro Huntriss shpjegon se këto përbërës mund të ndihmojnë në përmirësimin e qarkullimit të gjakut dhe në reduktimin e grumbullimit të pllakave yndyrore në arterie. Një analizë e vitit 2026, që përfshinte 13 studime dhe më shumë se 600 mijë njerëz, sugjeroi se konsumimi i moderuar i kafesë lidhej me rreth 8 për qind më pak rrezik për dështim të zemrës. Sipas ekspertëve, konsum i moderuar konsiderohen rreth dy deri në katër filxhanë në ditë. Edhe kafeja pa kafeinë mund të ketë përfitime, pasi ruan shumë prej përbërësve të dobishëm. Megjithatë, ekspertët paralajmërojnë se shumica e studimeve janë vëzhguese, çka do të thotë se nuk mund të provohet drejtpërdrejt se kafeja është shkaku i uljes së rrezikut. Për më tepër, sasi të larta të kafeinës mund të rrisin përkohësisht rrahjet e zemrës dhe tensionin e gjakut dhe te disa persona mund të shkaktojnë palpitacione. Udhëzimet ndërkombëtare sugjerojnë se tejkalimi i rreth 400 mg kafeinë në ditë mund të mos jetë i këshillueshëm. Nga ana tjetër, çaji ka treguar rezultate të forta në studimet për shëndetin e zemrës. Një analizë e vitit 2024 që përfshiu afro dy milionë persona zbuloi se konsumuesit më të mëdhenj të çajit të zi kishin rreth 14 për qind më pak rrezik për të vdekur nga sëmundjet e zemrës. Studiuesit sugjeruan se rreth një filxhan e gjysmë deri në tre filxhanë në ditë mund të jetë sasia optimale. Çaji përmban flavonoide, përfshirë flavan-3-olet, të cilat mund të ndihmojnë në funksionimin e mirë të enëve të gjakut. Studime të kontrolluara kanë treguar gjithashtu ulje të vogla të tensionit të gjakut te personat që konsumojnë rregullisht çaj të zi. Megjithatë, ka rëndësi edhe çfarë i shtohet çajit. Pak qumësht nuk përbën problem, por disa lugë sheqer të përdorura rregullisht mund të shtojnë kalori të panevojshme. Fituesi për zemrën: Çaji Pesha: Kafeja ka më shumë përparësi Një nga rregullat bazë të kontrollit të peshës është balanca mes kalorive që merren dhe atyre që shpenzohen. Por shpesh harrohet se edhe pijet mund të përmbajnë shumë kalori. Kafeja e zezë ka shumë pak kalori dhe mund të jetë një alternativë më e mirë sesa pijet me sheqer. Ekspertët thonë se ajo mund të ulë përkohësisht oreksin, megjithëse nuk rekomandohet si një trajtim i drejtpërdrejtë për humbje peshe. Disa studime sugjerojnë se përbërës të kafesë, jo domosdoshmërisht kafeina, mund të ndikojnë në hormonet e zorrëve që sinjalizojnë ngopjen në tru. Një studim vëzhgues finlandez zbuloi se personat që pinin më shumë kafe kishin tendencë të kishin më pak yndyrë trupore dhe abdominale dhe më shumë masë muskulore. Ky efekt dukej më i theksuar te meshkujt. Por ekspertët bëjnë një dallim të rëndësishëm mes kafesë së zezë dhe pijeve të mëdha me shurupe, sheqer, krem apo pana. Një kafe e thjeshtë është me pak kalori, por një pije e madhe me shumë qumësht, shurup dhe krem mund të bëhet shumë kalorike. Nëse konsumohet shpesh, kjo mund të kontribuojë në shtim peshe. Sa i përket çajit të zi, provat për një efekt të drejtpërdrejtë në humbjen e peshës janë më të dobëta. Një analizë e vitit 2024 që shqyrtoi 22 studime nuk gjeti ndonjë efekt domethënës të çajit të zi në humbjen e peshës, ndërsa kafeja tregoi rezultate më të favorshme. Përfitimi kryesor i çajit në këtë drejtim është se, pa sheqer, është gjithashtu një alternativë me pak kalori. Fituesi për kontrollin e peshës: Kafeja Truri: Të dyja mund të jenë të dobishme Kafeina është e njohur për efektin e saj në rritjen e vigjilencës dhe përqendrimit, veçanërisht pas një nate me pak gjumë. Por studimet kanë shqyrtuar edhe nëse kafeja dhe çaji mund të lidhen me një rrezik më të ulët për demencë. Në një studim të madh të publikuar vitin e kaluar, studiues nga SHBA dhe Britania analizuan të dhëna nga rreth 130 mijë persona gjatë një periudhe prej 40 vitesh. Rreziku më i ulët për demencë u pa te personat që konsumonin dy deri në tre filxhanë kafe ose një deri në dy filxhanë çaj në ditë. Megjithatë, edhe ky ishte një studim vëzhgues, prandaj nuk mund të provohet se pijet vetë janë përgjegjëse për efektin. Çaji përmban gjithashtu polifenole dhe flavonoide me veti antioksiduese dhe anti-inflamatore, të cilat mund të kenë rol në shëndetin e trurit dhe të enëve të gjakut. Ekspertët theksojnë se, për shëndetin afatgjatë të trurit, shumë më e rëndësishme është tabloja e përgjithshme e stilit të jetesës. Kjo përfshin një dietë të balancuar, aktivitet fizik të rregullt, mos pirjen e duhanit, kufizimin e alkoolit dhe ruajtjen e aktivitetit social dhe mendor. Fituesi për trurin: Të dyja Përfundimi As çaji dhe as kafeja nuk mund të konsiderohen si “ilaç” më vete. Çaji duket se ka një avantazh të lehtë për shëndetin e zemrës, ndërsa kafeja mund të jetë më e dobishme për kontrollin e peshës. Për shëndetin e trurit, të dyja pijet mund të kenë përfitime të mundshme. Megjithatë, ekspertët theksojnë se mënyra e konsumimit ka po aq rëndësi sa vetë pija. Pijet tepër të nxehta, sasitë e larta të kafeinës dhe shtimi i tepërt i sheqerit, shurupeve apo kremit mund t’i zbehin përfitimet e mundshme. Në fund, për shumicën e njerëzve, çaji dhe kafeja mund të jenë pjesë e një diete të shëndetshme, për sa kohë konsumohen me masë.
