Laert Haxhiu, i dënuar me burgim të përjetshëm për ngjarjen e njohur si “masakra e Lushnjës” në vitin 2017, ka kërkuar në Gjykatën Kushtetuese rigjykimin e çështjes së tij. Kërkesa është depozituar me pretendimin se gjatë procesit gjyqësor janë cenuar të drejtat dhe liritë e tij themelore të garantuara nga Kushtetuta.
Relatore e çështjes në Gjykatën Kushtetuese është caktuar Sonila Bejtja. Vendimi i Gjykatës së Posaçme kundër Korrupsionit dhe Krimit të Organizuar (GJKKO), që e dënoi Haxhiun me burgim të përjetshëm, ishte lënë në fuqi nga Apeli dhe më pas edhe nga Gjykata e Lartë.
Haxhiu, i njohur si “rivali” i Aldo Bares, ish-kreut të bandës së Lushnjës, akuzohet për vrasjen e Zamir Latifit dhe Jurgen Hoxhës, si dhe për plagosjen e Marjus Xhepexhiut dhe Bujar Turkut në Lushnjë në vitin 2017. Tashmë pritet shqyrtimi i kërkesës së tij nga Gjykata Kushtetuese.