Dy ditë pas incidentit me armë zjarri pranë një parcele me kanabis në fshatin Kodërbojë të Pukës, policia ka identifikuar personin e armatosur që u largua me shpejtësi nga vendi i ngjarjes dhe nuk iu bind urdhrit për të ndaluar.
Në kërkim është shpallur 30-vjeçari me inicialet K. L., banues në Kodërbojë, i cili dyshohet se është i përfshirë në kultivimin e 120 bimëve narkotike të zbuluara në parcelë. Sipas hetimeve, ai dyshohet se qëndronte i armatosur pranë parcelës për ta ruajtur atë.
Ngjarja ndodhi më 22 gusht, gjatë një operacioni të Policisë së Pukës për evidentimin dhe goditjen e rasteve të kultivimit të bimëve narkotike.
Gjatë kontrollit në zonë, efektivët konstatuan parcelën me 120 bimë të dyshuara narkotike. Pranë saj u pikas edhe një person i armatosur, i cili sapo dalloi policinë nisi të largohej.
Efektivët i dhanë urdhër të ndalonte, por 30-vjeçari nuk iu bind. Për ta ndaluar, një prej punonjësve të policisë qëlloi në ajër si të shtënë paralajmëruese. Pavarësisht kësaj, personi vijoi arratisjen dhe, duke përfituar nga terreni i vështirë malor, arriti t'u shpëtonte forcave të policisë.
Fillimisht, të shtënat në zonë krijuan dyshime se mund të ishin hapur nga personat që kultivonin parcelën. Policia sqaroi më pas se arma ishte përdorur nga një prej efektivëve gjatë ndjekjes së personit të armatosur.
Pas dy ditësh hetime, autoritetet kanë mundur të identifikojnë 30-vjeçarin, i cili tashmë është shpallur në kërkim. Përveç dyshimeve për kultivimin e 120 bimëve narkotike, hetuesit po verifikojnë edhe rolin e tij në ruajtjen e parcelës.
Ndërkohë, forcat e policisë vijojnë kontrollet në zonë për lokalizimin dhe kapjen e të riut.