Një apel prekës për ndihmë ka mbërritur në redaksinë e JOQ Albania nga një nënë e tre fëmijëve, e cila kërkon mbështetjen e qytetarëve për bashkëshortin e saj që ndodhet në gjendje të rënduar shëndetësore.
Sipas familjarëve, 65-vjeçari Michail Kormuli ndodhet i shtruar në Reanimacionin e Kardiologjisë në QSUT dhe ka nevojë urgjente për transfuzione gjaku.
Familjarët bëjnë me dije se pacienti ka një dren të vendosur në mushkëri, pasi i është mbledhur gjak dhe për shkak të humbjeve të vazhdueshme i nevojiten rreth dy qese gjak çdo ditë.
“Ju lutem nga zemra, kush mundet të na ndihmojë. Nuk e dimë sa gjatë do të ketë nevojë, pasi humbet gjak çdo ditë”, shprehet familjarja në apelin e saj.
Dhurohet gjak në çdo qytet, ndërsa për informacion më të detajuar qytetarët mund të kontaktojnë familjen në numrin: +355 69 293 4817
Familja kërkon ndihmën e kujtdo që ka mundësi të dhurojë, në mënyrë që 65-vjeçari të vijojë trajtimin mjekësor.