Themeluesi i Master Menu dhe ZULU Cars flet për sipërmarrjen, librin e tij mbi inteligjencën artificiale dhe mundësitë për të ndërtuar produkte teknologjike për Shqipërinë. Jurgen Kola u rrit në Shqipëri dhe më pas u zhvendos në Shtetet e Bashkuara për të studiuar. Sot jeton në Massachusetts dhe punon në zhvillimin e produkteve teknologjike. Në një intervistë për Report TV, ai foli për rrugën nga programimi te sipërmarrja, për projektet që ka ndërtuar dhe për arsyen pse vazhdon të investojë kohë edhe në tregun shqiptar. “Fillova të mendoja: nëse mund të ndërtoj një program që zgjidh një problem, pse të mos ndërtoj një produkt? Dhe nëse ai produkt mund të ndihmojë shumë njerëz apo biznese, pse të mos ndërtoj edhe një kompani rreth tij?”, tha Kola. Kjo mënyrë të menduari lidh tri pjesë të punës së tij: Master Menu, platformën ZULU Cars dhe librin e tij për ndërtimin e sistemeve të inteligjencës artificiale. Master Menu: të ndihmosh bizneset të gjenden më lehtë Përmes Master Menu, Kola ndihmon biznese, veçanërisht biznese të vogla dhe restorante, të përmirësojnë praninë e tyre online dhe mënyrën se si klientët i gjejnë e i kontaktojnë. Synimi i tij është që teknologjia të jetë e përdorshme edhe për bizneset që nuk kanë kohë ose staf të specializuar për t’u marrë vetë me çdo pjesë të saj. “Shumë prej këtyre bizneseve janë shumë të mira në atë që bëjnë, por jo gjithmonë kanë kohën apo njohuritë teknike për të krijuar një prezencë të mirë online”, shpjegoi ai. Puna me bizneset i ka mësuar Kolës se një produkt nuk përmirësohet vetëm duke shtuar funksione të reja. Sipas tij, duhet të flasësh me klientët, të kuptosh vështirësitë që hasin dhe të jesh i gatshëm ta ndryshosh zgjidhjen sipas asaj që u nevojitet realisht. “Ideja është vetëm fillimi”, tha ai. ZULU Cars: një vend i posaçëm për blerjen dhe shitjen e automjeteve Projekti më i ri i Kolës është ZULU Cars, një platformë shqiptare e dedikuar për automjetet. Ideja lindi nga mënyra e shpërndarë se si publikohen sot makinat në Shqipëri: në rrjete sociale, në Marketplace dhe në faqe të ndryshme. Për një blerës, kërkimi në disa vende mund ta bëjë më të vështirë krahasimin e alternativave. Për një tregtar, mund të jetë e vështirë të mbajë dhe të promovojë të gjithë inventarin në mënyrë të organizuar. ZULU Cars synon t’u japë blerësve mundësinë të kërkojnë e të filtrojnë automjete në një platformë të dedikuar, ndërsa tregtarëve një profil biznesi ku mund të paraqesin makinat e tyre. “Për blerësin, duam që procesi të jetë sa më i thjeshtë: të hyjë në një vend, të kërkojë, të filtrojë dhe të krahasojë makina sipas asaj që kërkon”, tha Kola. Brenda pak ditësh nga lançimi, ZULU Cars kaloi 100 automjete të publikuara në platformë. Prezantimi i projektit ka tërhequr vëmendje edhe në rrjetet sociale: sipas të dhënave të faqes së ZULU Cars në Instagram, përmbajtja e saj regjistroi rreth 14,500 shikime në tri ditë. Kola thotë se këto janë vetëm hapat e parë. Ai po punon për të zgjeruar inventarin dhe për të përfshirë më shumë tregtarë, me synimin që platforma të bëhet një mjet i dobishëm si për bizneset, ashtu edhe për njerëzit që kërkojnë të blejnë ose të shesin një makinë. Një libër praktik për inteligjencën artificiale Krahas sipërmarrjes, Kola është autor i librit “Building an AI Knowledge Assistant: A Beginner-Friendly Guide to Document Processing, RAG, and Grounded AI Answers”. Në të ai shpjegon si mund të ndërtohet një asistent që kërkon informacion në dokumente dhe e përdor atë për të dhënë përgjigje të mbështetura në burime. Ai jep një shembull të thjeshtë: nëse një person ose organizatë ka qindra dokumente, gjetja e një informacioni të caktuar mund të marrë shumë kohë. Një sistem i ndërtuar për të punuar me ato dokumente mund të gjejë pjesët përkatëse dhe t’i përdorë për t’iu përgjigjur një pyetjeje. Libri ndjek procesin nga përpunimi i dokumenteve dhe kërkimi i informacionit te RAG dhe memoria e bisedës. “Qëllimi im ishte që libri të mos ishte vetëm teorik, por dikush që e lexon të kuptojë se si këto sisteme ndërtohen dhe përdoren në praktikë”, u shpreh Kola. Ai beson se inteligjenca artificiale mund t’i ndihmojë njerëzit të analizojnë informacion dhe të kryejnë më shpejt shumë detyra. Megjithatë, thekson se përgjigjet e saj duhen kontrolluar, sidomos kur përdoren për vendime të rëndësishme. “AI nuk është magji dhe nuk është gjithmonë e saktë”, tha ai. Nga diaspora, me vëmendje te Shqipëria Megjithëse jeton në SHBA, Kola sheh mundësi për zhvillimin e teknologjisë në Shqipëri. Sipas tij, vendi ka të rinj të aftë në programim, dizajn dhe marketing, ndërsa startup-et mund të përfitojnë nga më shumë mentorim, investime dhe bashkëpunim mes universiteteve e kompanive. Ai beson se edhe diaspora shqiptare mund të luajë një rol të rëndësishëm: shqiptarët që kanë studiuar, punuar ose ndërtuar biznese jashtë vendit mund të sjellin përvojën dhe lidhjet e tyre në projekte që zhvillohen në Shqipëri. Për Kolën, Master Menu, ZULU Cars dhe libri mbi inteligjencën artificiale kanë një pikë të përbashkët. Secili nisi me përpjekjen për të kuptuar një problem konkret dhe për të ndërtuar një zgjidhje që njerëzit mund ta përdorin në praktikë. SI.E./ReportTv.al jurgen kola Sondazhi i ditës: Arrestimet e fundit nga SPAK, a janë provë e pavarësisë nga politika? Po 46.5% Jo 42.2% Disi 11.3% Vota total: 3644 Sondazhi i ditës: Arrestimet e fundit nga SPAK, a janë provë e pavarësisë nga politika?
