Reperi i famshëm amerikan Jay-Z do të jetë protagonisti i spektaklit muzikor gjatë pushimit të Super Bowl LXI, që do të zhvillohet më 14 shkurt 2027, në stadiumin SoFi të Kalifornisë. Për herë të parë, artisti që prej vitesh ka pasur një rol kyç në përzgjedhjen e këngëtarëve për këtë ngjarje, do të jetë vetë në qendër të skenës.
Njoftimi u bë më 26 tetor, gjatë ndeshjes së futbollit amerikan mes Philadelphia Eagles dhe Dallas Cowboys. Paralelisht, kompania e tij Roc Nation publikoi në Instagram një video ku reperi shfaqej i ulur në një stadium, e shoqëruar me mesazhin: “Sekreti i më të madhit të të gjitha kohërave doli në shesh”.
Për Jay-Z, performanca në një prej ngjarjeve më të ndjekura në botë përfaqëson një moment të veçantë, që përkon me 30-vjetorin e nisjes së karrierës së tij diskografike.
“Udhëtimi nga Reasonable Doubt deri te skena e pushimit të Super Bowl ka qenë i gjatë. Tridhjetë vite muzikë, punë dhe kulturë në skenën më të madhe të botës. Kjo rrugë vazhdon të jetë një ëndërr që po bëhet realitet”, u shpreh reperi.
Albumi i tij i parë, Reasonable Doubt, u publikua në vitin 1996 dhe shënoi fillimin e një karriere që e ktheu Jay-Z në një prej emrave më me ndikim të hip-hopit.
Lidhja e artistit me Super Bowl nuk është e re. Që prej vitit 2019, kompania Roc Nation bashkëpunon me Ligën Kombëtare të Futbollit Amerikan (NFL) për organizimin e performancave muzikore dhe projekteve sociale.
Nëpërmjet këtij partneriteti, Jay-Z ka ndikuar drejtpërdrejt në përzgjedhjen e artistëve që kanë performuar në spektaklin e përvitshëm. Producenti Jesse Collins ka treguar më herët se vendimi për emrat që ngjiten në skenë merret nga vetë reperi.
“Është një vendim që e merr Jay. Që kur kemi nisur të merremi me produksionin, ai e bën përzgjedhjen çdo vit dhe rezultati është i jashtëzakonshëm. Ai zgjedh gjithmonë siç duhet”, është shprehur Collins.
Njoftimi për pjesëmarrjen në Super Bowl vjen në një periudhë kur Jay-Z po rikthen vëmendjen te albumet që kanë shënuar karrierën e tij. Së fundmi, HBO ka publikuar dokumentarin me tetë episode JAŸ-Z in 8, ndërsa artisti ka organizuar koncerte për të festuar 30-vjetorin e Reasonable Doubt dhe 25-vjetorin e The Blueprint.
Duke reflektuar mbi rrugëtimin e tij, reperi ka treguar se secili album ka përfaqësuar një etapë të ndryshme të zhvillimit artistik, nga hapat e parë në industrinë muzikore deri te konsolidimi i suksesit ndërkombëtar.
“Ishte ai momenti kur thashë: ‘Jam këtu. Ia dola dhe kam ardhur për të qëndruar’”, ka kujtuar ai për periudhën e publikimit të The Blueprint.
Në edicionin e vitit 2027, Jay-Z do të pasojë Bad Bunny-n, i cili performoi në spektaklin e Super Bowl LX në vitin 2026.
Performanca e 14 shkurtit pritet të sjellë një përmbledhje të tri dekadave të karrierës së reperit amerikan, përpara miliona shikuesve që ndjekin çdo vit një prej ngjarjeve më të mëdha sportive dhe muzikore në botë.