30 arrestime dhe sekuestrim pasurish me vlerë mbi 21 milionë euro është bilanci i një operacioni të Guardia di Finanza-s së Milanos dhe Monza Brianza-s, i cili ka zbuluar “bankën e fshehtë” në shërbim të krimit të organizuar. Mes të arrestuarve ka edhe shqiptarë Banka ishte në gjendje të transferonte shuma të mëdha kapitali përtej kufijve të Italisë, me degëzim edhe në Ticino. Bëhet fjalë për shuma parash që vinin kryesisht nga mashtrimet fiskale, por edhe nga trafiku ndërkombëtar i lëndëve narkotike dhe i armëve. LEXO edhe...Zbulohet plantacioni me mbi 1200 bimë kanabisi në Itali, vlera në treg mbi 1 milionë euro! Arrestohet shqiptari që kujdesej për drogën Një nga arrestimet është kryer në Lugano. Bëhet fjalë për një 62-vjeçar të lindur në Napoli, i regjistruar që prej vitit 2017 si shtetas italian me rezidencë jashtë vendit në Hungari dhe që prej vitit 2023 në Ticino. Ai, së bashku me 13 të arrestuar të tjerë, akuzohet për pjesëmarrje në një organizatë kriminale, me rrethana rënduese për shkak të përdorimit të metodave mafioze. Disa prej tyre janë pjesëtarë të ’Ndrangheta-s, Camorra-s dhe të së ashtuquajturës “Mafia e Katërt”, që i referohet krimit të organizuar në zonën e Foggias. Hetimi ka çuar në zbulimin e faturave të falsifikuara me vlerë mbi 110 milionë euro dhe të pastrimit ndërkombëtar të 68 milionë eurove përmes kriptomonedhave. Sipas akuzës, një pjesë e këtij aktiviteti të pastrimit të parave kalonte përmes Luganos. Përveç arrestimeve, janë kryer kontrolle në disa provinca italiane, ku janë angazhuar mbi 350 efektivë të Guardia di Finanza-s, si dhe njësi të specializuara dhe forca të njësisë së ndërhyrjes së shpejtë kundër terrorizmit të këtij institucioni. Kontrolle janë kryer edhe në Ticino, ku efektivët e Guardia di Finanza-s kanë sekuestruar para të gatshme, llogari bankare, kriptomonedha, automjete, mjete lundruese, bizhuteri, ora luksoze dhe makina për numërimin e parave. Hetimet e Guardia di Finanza-s zbuluan se në Pero, në zonën mes provincave të Como-s dhe Milanos, ishte krijuar një “bankë e fshehtë” e mirëfilltë, e maskuar pas një kompanie për dhënien me qira të automjeteve. Pas saj qëndronin tre shtetas italianë, të cilët dyshohet se kishin lidhje me organizata mafioze: dy prej tyre ishin lidhje të qëndrueshme të klaneve të ’Ndrangheta-s në zonën e Crotone-s, të dënuar përfundimisht në kuadër të hetimeve “Infinito” dhe “Aemilia”, ndërsa i treti ishte pjesë e klanit Casalesi. Organizata kriminale mbështetej gjithashtu nga bashkëpunëtorë kinezë dhe shqiptarë, duke krijuar një infrastrukturë financiare ndërkombëtare me efikasitet të lartë për veprimtari të paligjshme. Sipas Prokurorisë së Milanos, organizata ofronte shërbimin e lëshimit të faturave për transaksione fiktive, me një vlerë totale prej 110 milionë eurosh, përmes një rrjeti të dendur kompanish guaskë, të krijuara për të lëshuar fatura pa aktivitet real ekonomik. Pasi merrnin transfertat bankare për pagesën e faturave të falsifikuara, të dyshuarit ua kthenin sipërmarrësve bashkëpunues shumën përkatëse në para të gatshme, përmes korrierëve. Në terma teknikë, kjo njihet si kthim i shumave të transferuara. Paratë e gatshme vinin si nga evazioni fiskal, ashtu edhe nga trafiku i lëndëve narkotike. Fondet e grumbulluara në llogaritë bankare transferoheshin më pas pothuajse tërësisht në llogari jashtë vendit ose investoheshin në blerjen e kriptomonedhave që janë të vështira për t'u gjurmuar. Ky aktivitet i fundit kryhej nga personi i arrestuar në Lugano. Në këtë mënyrë, “banka e fshehtë” u ofronte klientëve të saj, kryesisht trafikantëve të drogës dhe personave që shmangnin detyrimet fiskale, të gjitha shërbimet tipike të një institucioni financiar, por përmes kanaleve të fshehta që u mundësonin transferimin e parave jashtë sistemit zyrtar dhe anashkalimin e kontrolleve kundër pastrimit të parave. Emri i menaxherit 62-vjeçarit italian i arrestuar në Ticino, është ndër emrat e 30 personave ndaj të cilëve është lëshuar urdhri i arrestit prej 563 faqesh. Sipas urdhrit të gjykatës, ai dyshohet se i kishte vënë në dispozicion organizatës kriminale ekspertizën e tij në menaxhimin e flukseve financiare të paligjshme, duke dhënë një kontribut të vazhdueshëm në hartimin dhe planifikimin e operacioneve për riinvestimin dhe pastrimin e të ardhurave nga aktivitetet kriminale. Ai mund të mbështetej te kompani të huaja që operonin në sektorin bankar dhe atë të monedhave virtuale. Mes tyre ishte edhe një kompani me seli në Zvicër, e specializuar në kriptomonedha, e cila aktualisht ndodhet në likuidim. Sipas hetuesve, ai kishte mbajtur pozicione drejtuese në këto kompani, si drejtor ekzekutiv (CEO) ose menaxher i lartë. Autoritetet italiane dyshojnë se ai i kishte ofruar organizatës në mënyrë të vazhdueshme ndihmën e tij, duke hapur llogari bankare jashtë vendit, me numra IBAN të Luksemburgut, të regjistruara drejtpërdrejt në emër të kompanive guaskë. Në këto llogari dyshohet se kalonin shuma të mëdha parash të krijuara nga pagesat e faturave për transaksione fiktive, si dhe nga veprime të mëvonshme për “pastrimin” e të ardhurave të paligjshme. Këto të ardhura lidhen si me faturimin e rremë, ashtu edhe me mashtrimet financiare në internet. Sipas hetuesve, përdorimi i teknologjisë blockchain mundësonte ruajtjen e anonimitetit të këtyre flukseve financiare. Urdhri i gjyqtarit të hetimeve paraprake të Milanos vijon duke theksuar se 62-vjeçari dyshohet se ishte marrë edhe me hapjen dhe administrimin e kuletave digjitale (wallets), të përdorura për të penguar identifikimin e origjinës kriminale të parave. Sipas hetuesve, shuma e përfshirë në këto operacione ishte të paktën 51,5 milionë euro, të transferuara përmes llogarive bankare në emër të kompanive guaskë që kontrolloheshin nga organizata kriminale. - 48,2 milionë euro dyshohet se u përdorën për të gjeneruar kriptomonedha, me një vlerë prej të paktën 47,2 milionë eurosh. - 3,3 milionë euro lidhen me flukset financiare të identifikuara gjatë verifikimeve bankare. P.J/ReportTv.al shqiptari ne itali itali pastrim parash skeme mashtrimi Komento Komente Sondazhi i ditës: A i mbështesni protestat e dhunshme në vend? Po 18.7% Jo 78.3% Disi 3% Vota total: 12587 Sondazhi i ditës: A i mbështesni protestat e dhunshme në vend?
