Ilaçet e bazuara në semaglutid janë vendosur shpejt si trajtime për obezitetin dhe diabetin, edhe pse janë shfaqur shenja se efekti i tyre në uljen e oreksit ndonjëherë mund të çojë në kequshqyerje dhe madje edhe në rënie të flokëve. Por, si një efekt anësor potencialisht i mirëpritur, semaglutidi i njohur gjithashtu si GLP-1 mund të ofrojë gjithashtu mbrojtje kundër astmës, sipas shkencëtarëve të Imperial College London (ICL), të cilët folën në Kongresin e Shoqatës Evropiane të Sëmundjeve të Frymëmarrjes (ERS) në Barcelonë në shtator.Lexo edhe:30 sekonda mund t’ju ndryshojnë humorin - 5 zakone të thjeshta që ia vlen t’i provoni “Personat me sëmundje të rrugëve të frymëmarrjes, si astma dhe SPOK [sëmundja pulmonare obstruktive kronike], të cilëve u ishin përshkruar terapi me GLP-1, duket se kishin më pak sulme astmatike dhe përkeqësime të SPOK-së sesa persona të ngjashëm, të cilëve u ishin përshkruar barna të tjera për diabetin”, thanë studiuesit. “Efekti ishte më i fortë me semaglutidin, veçanërisht te personat me astmë, ku përdorimi i semaglutidit duket se lidhet me një ulje prej gati 40% të sulmeve astmatike”, shpjegoi Chloe Bloom, profesore e asociuar klinike në epidemiologjinë respiratore në Institutin Kombëtar të Zemrës dhe Mushkërive të ICL. Bloom dhe kolegët shqyrtuan të dhënat elektronike mjekësore në Mbretërinë e Bashkuar për rreth 20,000 persona, për të kryer katër studime paralele, të bazuara në faktin nëse pacientët po merrnin një trajtim me GLP-1 apo sulfonilurea, një tjetër medikament për diabetin. Megjithatë, ky hulumtim nuk do të thotë se personat me astmë ose personat me probleme të tjera të frymëmarrjes duhet të fillojnë të marrin barna për humbjen e peshës. “Na nevojiten prova klinike që të përfshijnë rezultate të lidhura me sistemin e frymëmarrjes, të tilla si sulmet astmatike, përkeqësimet e SPOK-së, funksioni i mushkërive, simptomat dhe cilësia e jetës, për të përcaktuar nëse trajtimet metabolike mund të bëhen pjesë e një qasjeje më të gjerë dhe më të personalizuar për menaxhimin e sëmundjeve të rrugëve të frymëmarrjes”, tha Alexander Mathioudakis nga Universiteti i Mançesterit, i cili drejton grupin e ERS-së për trajtimin e sëmundjeve të rrugëve të frymëmarrjes./DPA News
