Një plumb në kokën e një militanti palestinez ishte momenti që nxori për herë të parë në pah ndarjen e thellë mes Gadi Eisenkot dhe Benjamin Netanyahut. Në mars të vitit 2016, dy palestinezë të armatosur me thika sulmuan ushtarë izraelitë në Bregun Perëndimor, duke plagosur njërin prej tyre. Ushtarët hapën zjarr, duke vrarë njërin sulmues dhe duke lënë tjetrin të plagosur në tokë. Disa minuta më vonë, ushtari 19-vjeçar Elor Azaria qëlloi në kokë palestinezin e plagosur. Azaria tha se ishte ndjerë i kërcënuar, por ngjarja ndau opinionin publik izraelit. Një pjesë e konsideruan hero, ndërsa të tjerë thanë se kishte kryer një ekzekutim jashtëgjyqësor. Gjykata ushtarake e shpalli fajtor për vrasje nga pakujdesia. LEXO edhe...Irani: Hormuzi i mbyllur, jemi në luftë me SHBA-në! Thirrje Francës dhe Britanisë së Madhe: Mos armatosni Izraelin! Në atë kohë, Eisenkot ishte shef i Shtabit të Forcave të Mbrojtjes së Izraelit. Ai mbështeti vendimin për ta çuar ushtarin në gjyq, duke argumentuar se qëllimi ndaj një personi të neutralizuar nuk përputhej me vlerat e ushtrisë. Netanyahu mbajti qëndrim të kundërt dhe kërkoi faljen e ushtarit. Ajo përplasje vazhdon edhe sot të përdoret si simbol i dallimeve mes dy figurave politike. Dhjetë vjet më vonë, Eisenkot nuk është më vetëm një ish-gjeneral. Ai është kthyer në sfidantin më të fortë të Netanyahut për zgjedhjet parlamentare të 27 tetorit. Partia e tij e qendrës "Yashar!", e themeluar vitin e kaluar, ka fituar terren në sondazhe dhe në disa matje ka kaluar edhe Likudin, partinë që drejton Netanyahu. Kjo rritje lidhet me pakënaqësinë e një pjese të izraelitëve për mënyrën se si qeveria reagoi pas sulmit të Hamasit më 7 tetor 2023 dhe luftës që pasoi në Gaza. Për shumë vite Netanyahu ka dominuar politikën izraelite me profilin e tij të fortë si garant i sigurisë kombëtare. Lufta në Gaza, tensionet me partnerët ndërkombëtarë dhe debatet e brendshme kanë krijuar, megjithatë, një terren të ri politik, ku Eisenkot po përpiqet të paraqitet si alternativë. Mbështetësit e tij e shohin si një figurë me integritet të lartë dhe me përvojë të gjatë në ushtri. Kundërshtarët, ndërkohë, e akuzojnë se është tepër i moderuar dhe se nuk do të kishte ndjekur të njëjtën linjë të ashpër ndaj Hamasit. Edhe ish-këshilltari i Netanyahut, Shai Bazak, pranon se Eisenkot mund të tërheqë votues të djathtë pikërisht sepse nuk shihet si figurë përçarëse. "Ka momente në histori kur njerëzit zgjedhin një drejtues më pak karizmatik, sepse duan qetësi. Eisenkot nuk është ekstrem dhe kjo e ndihmon të fitojë besimin edhe të votuesve tradicionalë të së djathtës", është shprehur ai. Garën elektorale për zgjedhjet e tetorit e shoqëron një klimë krejt ndryshe nga ajo e viteve të mëparshme. Sulmi i Hamasit më 7 tetor 2023, ku u vranë rreth 1.200 persona dhe u morën peng 251 të tjerë, ndryshoi jo vetëm politikën e brendshme të Izraelit, por edhe marrëdhëniet e vendit me botën. Solidariteti ndërkombëtar që pasoi sulmin u zbeh me kalimin e muajve, ndërsa lufta në Gaza vazhdoi. Sipas Ministrisë së Shëndetësisë në Gaza, e drejtuar nga Hamasi, më shumë se 73 mijë palestinezë janë vrarë gjatë luftës. Zyrtarë ushtarakë izraelitë kanë pranuar se numri total i viktimave është rreth 70 mijë, ndërsa ushtria ka deklaruar se ka vrarë mbi 22 mijë militantë dhe se për çdo militant të vrarë kanë humbur jetën dy deri në tre civilë. Kjo ka ndikuar edhe në marrëdhëniet diplomatike të Izraelit. Në disa vende evropiane, veçanërisht në Spanjë dhe Francë, kritikat ndaj qeverisë së Netanyahut janë shtuar. Marrëdhëniet me Bashkimin Evropian janë përkeqësuar deri në atë pikë sa ministri i Jashtëm Gideon Sa'ar ndërpreu kontaktet me shefen e diplomacisë evropiane Kaja Kallas, pasi ajo krahasoi trajtimin e palestinezëve me sistemin e aparteidit në Afrikën e Jugut. Edhe marrëdhëniet me Shtetet e Bashkuara kanë kaluar momente tensioni. Edhe pse Donald Trump bashkëpunoi me Netanyahun në sulmet ndaj Iranit, ai e ka kritikuar herë pas here për mënyrën si është zhvilluar ofensiva në Liban. Lufta në Gaza ka ndikuar gjithashtu në rënien e mbështetjes për Izraelin tek një pjesë e opinionit amerikan. Në këtë klimë politike, Netanyahu ka zgjedhur ta sulmojë rivalin pikërisht aty ku Eisenkot konsiderohet më i fortë: përvoja e tij ushtarake. "Eisenkot donte të dorëzohej. Netanyahu lufton", thuhet në një nga videot e fushatës së Likudit. Eisenkot iu përgjigj duke thënë se strategjia e Netanyahut është gjithmonë e njëjtë. "Fushata kundër meje ka filluar. Ai u thotë gjithmonë qytetarëve se vetëm Netanyahu mund të garantojë sigurinë. Ne e pamë si funksionoi kjo më 7 tetor", deklaroi ai. Një nga premtimet kryesore të Eisenkot është ngritja e një komisioni shtetëror hetimor për dështimet e ushtrisë, shërbimeve të inteligjencës dhe udhëheqjes politike para sulmit të Hamasit. "Nëse nuk krijohet një komision hetimor, kjo do të rëndojë mbi shoqërinë izraelite si një mallkim", ka deklaruar ai. Eisenkot nuk është një orator si Netanyahu. Ai flet qetë, pa tone dramatike dhe pa sulme personale. Pikërisht ky stil ka bërë që shumë izraelitë ta shohin si një alternativë ndryshe. I lindur në një familje hebrenjsh me origjinë marokene, ai u rrit në Eilat dhe karrierën e nisi si ushtar i thjeshtë në Brigadën Golani. Më pas u ngjit deri në postin më të lartë ushtarak në vend, atë të shefit të Shtabit të Forcave të Mbrojtjes së Izraelit. Ironikisht, emërimi në atë detyrë u bë nga vetë Benjamin Netanyahu. Në fushatën aktuale edhe kjo është kthyer në objekt sulmesh politike. Likud ka publikuar reklama ku tallet me anglishten e Eisenkot, por kjo nuk duket se ka ndikuar në popullaritetin e tij. Mbështetje ai ka marrë edhe nga një pjesë e qytetarëve arabë të Izraelit, të cilët thonë se është ndër të paktët politikanë që ka folur për problemet e komunitetit të tyre. Megjithatë, elementi që ka prekur më shumë opinionin publik nuk lidhet me karrierën e tij ushtarake, por me historinë personale. Më 7 dhjetor 2023, djali i tij 25-vjeçar, Gal Meir Eisenkot, u vra gjatë një operacioni në Gaza, teksa merrte pjesë në përpjekjet për të rikuperuar trupat e dy izraelitëve të rrëmbyer nga Hamasi. Dy nipër të Eisenkot humbën gjithashtu jetën gjatë luftës. Ai nuk e ka përdorur këtë tragjedi në fushatën elektorale, por sakrifica e familjes së tij është e njohur në Izrael dhe ka ndikuar në mënyrën si shihet nga një pjesë e opinionit publik. Në kontrast, djali i Netanyahut, Yair, qëndroi në Florida gjatë mobilizimit të rezervistëve pas sulmit të Hamasit, gjë që u bë objekt kritikash në Izrael. Netanyahu ka deklaruar se ai po ndihmonte nga Shtetet e Bashkuara në sigurimin e pajisjeve për ushtrinë dhe shërbimet e emergjencës. Ekspertët kujtojnë se kalimi nga ushtria në politikë nuk ka qenë gjithmonë i suksesshëm në Izrael. Shumë ish-shefa të Shtabit kanë hyrë në politikë, por vetëm pak kanë arritur të lënë gjurmë. Ehud Barak u bë kryeministër, por qeveria e tij zgjati më pak se dy vjet, ndërsa Benny Gantz, dikur rivali kryesor i Netanyahut, ka humbur mbështetjen që kishte fituar disa vite më parë. Historiani ushtarak Danny Orbach thotë se ushtria dhe politika funksionojnë sipas logjikave krejt të ndryshme. "Në ushtri mund t'u bërtasësh vartësve. Në politikë njerëzit thjesht largohen", shprehet ai, duke shtuar se Eisenkot shihet si një figurë patriotike dhe e ndërgjegjshme, por me përvojë të kufizuar politike. Vetë Eisenkot kundërshton kritikat se do të kishte ndërprerë luftën në Gaza. Ai ka argumentuar se Izraeli mund të kishte arritur një marrëveshje për lirimin e pengjeve dhe më pas të rifillonte operacionet kundër Hamasit. Fushata e tij nuk është ndërtuar mbi premtime spektakolare, por mbi idenë se Izraeli ka nevojë për një drejtim tjetër pas viteve të gjata të Netanyahut. Në fund të takimeve elektorale dëgjohet shpesh një këngë e vjetër izraelite për paqen, me refrenin: "Gjithçka do të jetë në rregull", një mesazh që përmbledh edhe mënyrën se si Eisenkot po përpiqet të prezantohet para zgjedhësve. U.D/ReportTv.al Gadi Eisenkot Benjamin Netanyahu Izrael Komento Komente Sondazhi i ditës: Si po menaxhohet situata me zjarret? Mirë 68.4% Keq 24.2% Nuk e di 7.4% Vota total: 326 Sondazhi i ditës: Si po menaxhohet situata me zjarret?
