Një gjykatë federale në SHBA ka rrëzuar vendimin e administratës amerikane për pezullimin e përpunimit të vizave për shtetasit e 75 vendeve, përfshirë Shqipërinë, Kosovën dhe Maqedoninë e Veriut. Vendimi, i marrë nga gjyqtarja Jeannette A. Vargas në Distriktin e Manhattanit, përbën një goditje për politikën e imigracionit të administratës së Presidentit Donald Trump, e cila kishte justifikuar masën me shqetësimet se emigrantët mund të bëheshin “barrë ekonomike” për SHBA-në.
Gjyqtarja Vargas e cilësoi politikën “në kundërshtim me ligjin”, duke argumentuar se Sekretari i Shtetit Marco Rubio kishte tejkaluar autoritetin e tij ligjor. Sipas gjykatës, udhëzimi binte ndesh me dispozitat e Aktit të Imigracionit dhe Kombësisë të vitit 1965, pasi aplikimet për viza nuk mund të refuzohen vetëm mbi bazën e kombësisë. Gjykata theksoi se aplikantët duhet të vlerësohen individualisht dhe jo automatikisht sipas vendit të origjinës.
Me vendimin e ri, janë anuluar refuzimet e vizave të bazuara vetëm në këtë politikë dhe Departamenti i Shtetit është urdhëruar të rikthejë shqyrtimin rast pas rasti të aplikimeve. Megjithatë, administrata amerikane ruan të drejtën për ta apeluar vendimin. Masa kishte prekur rreth 40% të vendeve të botës, mes tyre Shqipërinë, Kosovën, Bosnjë-Hercegovinën, Brazilin, Egjiptin, Iranin, Irakun, Nigerinë, Rusinë dhe Turqinë.