Allison Guerriero, ish-e dashura e Charles McGonigal, ish-drejtorit të kundërzbulimit të FBI-së në Nju Jork, është gjetur e vdekur në banesën e saj në Florida të Jugut. Lajmi është raportuar nga “Daily Mail”, i cili shkruan se 52-vjeçarja ndërroi jetë vetëm pak orë pasi kishte publikuar dhjetëra postime në platformën X.
Vdekja e Guerrieros rikthen në vëmendje një prej personave që kishte dhënë informacion për aktivitetet e McGonigal dhe që kishte folur publikisht edhe për udhëtimet e tij në Shqipëri dhe marrëdhëniet me kryeministrin Edi Rama.
Sipas Daily Mail, Guerriero kishte publikuar të enjten rreth 75 postime në X, ndërsa në një prej videove shfaqej duke ecur në rrugë dhe kërkonte që vëmendja të përqendrohej edhe te zyrtarë të tjerë federalë. Në një tjetër postim, ajo shprehej: “E urrej FBI-në.”
Video e fundit Ish-partnerja që foli për McGonigalinGuerriero ka qenë në një lidhje me Charles McGonigal dhe më pas ishte bërë një prej personave që u kishte dhënë autoriteteve amerikane informacion mbi aktivitetet e ish-zyrtarit të FBI-së.
Çështja e saj mori rëndësi të veçantë për shkak të informacionit që ajo kishte dhënë për kontaktet e McGonigal jashtë Shteteve të Bashkuara.
Në deklaratat e saj, Guerriero kishte folur edhe për Shqipërinë dhe për marrëdhënien e McGonigal me kryeministrin Edi Rama.
Sipas informacionit të dhënë prej saj, McGonigal i kishte treguar se do të udhëtonte drejt Shqipërisë për t’u takuar me Ramën.
“Ai po shkonte në Shqipëri për t'u takuar me kryeministrin Edi Rama”, kishte deklaruar Guerriero, duke sqaruar se nuk i ishte treguar qëllimi i saktë i takimit.
Ajo kishte deklaruar gjithashtu se McGonigal dhe Rama kishin një marrëdhënie personale dhe se ish-zyrtari amerikan fliste shpesh për kryeministrin shqiptar.
Udhëtimet në ShqipëriInformacioni i Guerrieros u bë pjesë e materialeve që autoritetet amerikane shqyrtuan gjatë hetimit ndaj McGonigal.
Çështja shqiptare mori vëmendje të madhe pas publikimit të aktakuzës amerikane ndaj McGonigal, ku Shqipëria, biznesmenë shqiptarë dhe emri i kryeministrit Edi Rama u përmendën në dokumentet e gjykatës.
Megjithatë, përmendja e emrit të Ramës në aktakuzë nuk nënkuptonte se kryeministri ishte i akuzuar nga drejtësia amerikane për ndonjë vepër penale.
Dosja që tronditi FBI-nëCharles McGonigal ishte një prej drejtuesve të lartë të FBI-së dhe drejtonte zyrën e kundërzbulimit në Nju Jork përpara se të dilte në pension.
Ai u përball me dy çështje penale në Shtetet e Bashkuara. Në njërën prej tyre u akuzua për fshehjen e marrëdhënieve financiare me një ish-zyrtar të inteligjencës shqiptare dhe për marrjen e pagesave në lidhje me aktivitetet e tij.
Në një çështje tjetër, McGonigal u akuzua për shkelje të sanksioneve amerikane ndaj Rusisë, pasi kishte marrë pagesa nga oligarku rus Oleg Deripaska.
Ai u shpall fajtor dhe u dënua me burg.
Pikërisht kjo dosje e vendosi Shqipërinë në qendër të një prej skandaleve më të bujshme që kanë përfshirë një ish-zyrtar të lartë të FBI-së.
Vdekja e GuerrierosTashmë, vdekja e papritur e Allison Guerrieros ka rikthyer në vëmendje dëshmitë e saj dhe rolin që ajo pati në zbardhjen e aktiviteteve të ish-partnerit të saj.
Sipas Daily Mail, ajo ndërroi jetë në shtëpinë e saj në Florida të Jugut, vetëm disa orë pasi kishte qenë aktive në rrjetet sociale.
Nga informacionet e publikuara deri tani, nuk është bërë e ditur shkaku i vdekjes së saj, ndërsa rrethanat e plota mbeten për t’u sqaruar. Kontakto me Politiko në rast se: Mendoni se nuk shkruajmë Shqip Mendoni se kemi bërë shkelje etike Mendoni se kemi bërë CopyPaste Mendoni se kemi bërë FakeNews Doni të postoni nje Lajm