Për vite me radhë, gjaku i periodave ka qenë i rrethuar nga mite dhe tabu. Por një studim i ri nga Australia po i bën shkencëtarët ta shohin atë me një sy krejt tjetër, pasi rezultatet sugjerojnë se mund të ketë potencial të rëndësishëm për përdorime mjekësore në të ardhmen. Kërkimi u zhvillua nga Dr. Jemma Evans dhe ekipi i saj në Institutin Hudson të Kërkimeve Mjekësore në Melburn dhe u publikua në revistën shkencore The FASEB Journal. Qëllimi i studimit ishte të shqyrtonte nëse lëngu menstrual mund të ndihmojë në përshpejtimin e procesit të shërimit të lëkurës.Lexo edhe:Fermat industriale të pulave përhapin bakteret që shkaktojnë diarre Studiuesit nuk përdorën drejtpërdrejt gjakun menstrual. Ata mblodhën lëngun menstrual nga vullnetare, izoluan plazmën dhe proteinat që përmban dhe më pas i testuan ato në qeliza të lëkurës njerëzore në laborator. Rezultatet ishin mbresëlënëse: pas 24 orësh, qelizat e trajtuara me plazmë menstruale kishin arritur pothuajse shërim të plotë. Në krahasim, qelizat e trajtuara me plazmë të zakonshme gjaku kishin arritur vetëm rreth 40% shërim. Sipas Dr. Evans, çelësi mund të fshihet te endometriumi, shtresa e brendshme e mitrës. Ky ind ka aftësinë e jashtëzakonshme për t’u rigjeneruar plotësisht brenda vetëm tre deri në pesë ditë dhe ky proces përsëritet qindra herë gjatë jetës riprodhuese të një gruaje. Shkencëtarët besojnë se lëngu menstrual përmban proteina dhe faktorë bioaktivë që stimulojnë riparimin e qelizave dhe mund të shpjegojnë rezultatet e vëzhguara. Megjithatë, ekspertët theksojnë se është ende herët për të nxjerrë përfundime përfundimtare. Studimi është kryer vetëm në kushte laboratorike dhe jo te njerëzit, ndaj nevojiten kërkime të tjera për të konfirmuar efektet dhe sigurinë e mundshme. Ekipi kërkimor shpreson që në të ardhmen të identifikojë substancat më aktive të lëngut menstrual dhe t’i përdorë ato për zhvillimin e trajtimeve të reja, veçanërisht për plagët kronike që shërohen me vështirësi. Nëse rezultatet konfirmohen nga studime të mëtejshme, ajo që për shumë vite është konsideruar thjesht një proces biologjik rutinë mund të kthehet në një burim të vlefshëm për mjekësinë moderne.
