Një deklaratë e ministrit të Mbrojtjes, Ermal Nufi, në Parlament më 23 prill ka ngritur pikëpyetje të forta mbi aktivitetin e kompanisë Advanced Arms Technology (AAT). Nufi deklaroi se kompania prodhon armë dhe se ato janë aktualisht në përdorim në konflikte. Por, sipas dokumenteve të Tatimeve, AAT rezulton me vetëm dy të punësuar, administratoren Arjeta Puca dhe magazinierin Serxhio Gj. Të dhënat zyrtare ngrenë pikëpyetjen se si një kompani me këtë strukturë mund të realizojë prodhim armësh në përmasat e pretenduara nga ministri.
Dyshimet shtohen nga pretendime të bëra publike në një intervistë të Arben Ahmetajt me Çim Pekën, ku aksioneri i kompanisë, Ron Yeffet, flet për importe armësh dhe municionesh nga Sudani dhe paketimin e tyre në Shqipëri. Këto deklarata kërkojnë verifikim nga institucionet dhe nuk mund të konsiderohen në vetvete si prova për trafik ndërkombëtar armësh. Megjithatë, përballë deklaratës së ministrit dhe të dhënave për strukturën e kompanisë, çështja kërkon transparencë të plotë.
Tashmë pyetja është nëse ministri ka ekzagjeruar për aktivitetin e kompanisë apo nëse AAT ka kryer realisht veprimtari që lidhen me importin, eksportin apo tregtimin e armëve dhe municioneve. Për këtë arsye, organet kompetente duhet të verifikojnë dokumentacionin doganor dhe aktivitetin financiar të kompanisë. Nëse Nufi ka gabuar, kemi një tjetër deklaratë politike pa bazë, nëse ka folur mbi fakte, atëherë çfarë ka bërë realisht një kompani që, sipas Tatimeve, ka vetëm dy punonjës?