Zjarret masive që kanë përfshirë rajonin jugperëndimor të Girondës në Francë vazhdojnë të përhapen, ndërsa autoritetet paralajmërojnë se vala e katërt e të nxehtit këtë verë, me temperatura deri në 40°C, mund ta përkeqësojë më tej situatën. Mbi 2,000 zjarrfikës janë angazhuar për të luftuar flakët, të cilat kanë detyruar më shumë se 70,000 banorë të largohen nga shtëpitë e tyre gjatë javës së kaluar.
Sipas prefektes rajonale Sophie Brocas, të martën u regjistruan shpërthime të reja në 14 zona që ishin prekur më parë nga zjarret. Ajo theksoi se autoritetet nuk e konsiderojnë ende situatën nën kontroll.
Zëdhënësi i Federatës Kombëtare të Zjarrfikësve, Eric Brocardi, e përshkroi betejën me flakët si “Davidi kundër Goliathit”, duke bërë të ditur se katër zjarrfikës kanë humbur jetën në Francë gjatë javëve të fundit. Ai nënvizoi se kushtet e motit po e bëjnë gjithnjë e më të vështirë kontrollin e vatrave të zjarrit.
Edhe pse qyteti i Bordeaux nuk ndodhet aktualisht nën kërcënim të drejtpërdrejtë, autoritetet mbeten të shqetësuara pasi një nga vatrat e zjarrit është regjistruar vetëm 15 kilometra nga periferia e qytetit.
Komandanti i operacioneve, Rémi Lassoureille, paralajmëroi se ekziston rrezik për zonën metropolitane të Bordeaux, ndërsa cilësia e ajrit është përkeqësuar ndjeshëm për shkak të tymit.
Banorët dhe turistët raportojnë se tymi i dendur dhe hiri kanë mbuluar qytetin, duke detyruar shumë njerëz të mbajnë maska mbrojtëse dhe të qëndrojnë brenda. Disa restorante dhe kafene kanë pezulluar aktivitetin për shkak të ndotjes së ajrit.
Ndërkohë, temperaturat e larta nuk po prekin vetëm Francën. Në Spanjë priten temperatura deri në 40°C, ndërsa rajoni i Madridit është ndër më të goditurit nga zjarret.
Kryeministri Pedro Sánchez deklaroi se vendi po kalon ende ditë të vështira, por se situata po tregon shenja përmirësimi. Në Portugali, rreth 400 zjarrfikës po luftojnë një zjarr të madh në zonën lindore të Guardës. Top Channel