Reperi amerikan Macklemore ka njoftuar se do të dhurojë 1 milion dollarë për organizatat humanitare që ndihmojnë palestinezët, në një kohë kur largimi i tij nga turneu i Ed Sheeran ka shkaktuar reagime në botën e muzikës.
Artistit iu komunikua largimi nga turneu amerikan “Loop” i Ed Sheeran rreth një javë më parë, pas deklaratave të tij në skenë në mbështetje të një Palestine të lirë.
Në një reagim në Instagram, Macklemore bëri të ditur se do të ndajë 1 milion dollarë nga të ardhurat e tij të turneut për gjashtë organizata që ofrojnë ndihmë humanitare për palestinezët.
“Dua ta kthej çështjen aty ku i takon: te populli palestinez që ende vritet, ende jeton nën pushtimin ushtarak dhe ende lufton për lirinë e tij”, shkroi reperi.
Donacioni do të shkojë për organizatat HEAL Palestine, Gaza Soup Kitchen, American Near East Refugee Aid, Medical Aid for Palestinians dhe UNRWA USA National Committee.
Macklemore i bëri gjithashtu thirrje Robert Kraft, pronarit të stadiumit Gillette, që të kontribuojë me të njëjtën shumë për ndihmën humanitare.
“Jetët palestineze ia vlejnë të mbrohen. Një jetë palestineze nuk është më pak e vlefshme se çdo jetë tjetër në këtë tokë”, u shpreh ai.
Largimi i reperit është shoqëruar me akuza dhe deklarata të ndryshme nga palët e përfshira.
Macklemore ka akuzuar Robert Kraft se ushtroi presion mbi Ed Sheeran për ta larguar nga turneu, duke kërcënuar me anulimin e koncerteve në stadiumin Gillette nëse reperi do të vazhdonte të performonte.
Kraft ka konfirmuar përfshirjen e tij në vendim, duke argumentuar se deklaratat dhe materialet e shfaqura gjatë koncerteve ishin ofenduese dhe të dëmshme për komunitetin hebraik.
Nga ana tjetër, Ed Sheeran ka deklaruar se largimi i Macklemore ishte vendim i promotorit të turneut dhe jo i tij. Këngëtari tha se kishte marrë pjesë në diskutime me organizatorët dhe aktivistë nga të dyja palët për të gjetur një zgjidhje.
Pas largimit të reperit, edhe disa artistë të tjerë të turneut, mes tyre Finneas, Lukas Graham, Aaron Rowe dhe grupi Beoga, u tërhoqën në shenjë solidariteti me të.
Ndërkohë, Kraft ka deklaruar se Sheeran i kishte kërkuar të kontribuonte me 2 milionë dollarë për një donacion humanitar në rajon dhe se synonte të kontaktonte edhe pronarë të tjerë ambientesh për të vijuar përpjekjet humanitare.