Foto Pamfleti / Shqipëria renditet e dyta nga fundi në Ballkan për rritjen ekonomike. Raporti i Brukselit zbulon se investimet kanë ngadalësuar ritmin në 1,8%, industria kontribuon pothuajse zero në ekonomi, ndërsa papunësia e të rinjve arrin në 17,7%... Ekonomia shqiptare po shfaq një kontrast që ekspertët e Komisionit Europian e kanë evidentuar në raportin e tyre më të fundit, të publikuar më 20 tetor. Shqipëria regjistron rritjen më të lartë të konsumit privat në Ballkanin Perëndimor, ndërsa investimet ngadalësohen dhe industria jep një kontribut pothuajse të papërfillshëm në zhvillimin ekonomik.
Sipas raportit, gjatë tremujorit të dytë të vitit 2026, ekonomia shqiptare u rrit me 3,6%, kundrejt 3,7% në tremujorin e parë. Me këtë rezultat, Shqipëria renditet e dyta nga fundi në rajon, duke lënë pas vetëm Bosnjë-Hercegovinën, e cila regjistroi rritje prej 2,4%.
Maqedonia e Veriut kryesoi me 4,3%, e ndjekur nga Kosova me 4,1%, ndërsa Serbia dhe Mali i Zi regjistruan rritje prej 3,8%.
Dallimi bëhet më i dukshëm te investimet.
Në Shqipëri, ritmi i rritjes së investimeve zbriti në 1,8%, nga 4% në tremujorin e parë dhe 9,9% në fund të vitit të kaluar. Ndërkohë, Maqedonia e Veriut regjistroi rritje të investimeve prej 16,5%, ndërsa Mali i Zi prej 26,5%.
Raporti evidenton se Shqipëria ishte përjashtimi i vetëm nga përshpejtimi i investimeve në rajon. Kjo nuk do të thotë se vlera e investimeve shqiptare ka rënë në terma absolutë. Ato vazhdojnë të rriten, por me një ritëm shumë më të ngadaltë.
Ndërkohë, konsumi privat në Shqipëri u rrit me 4,6%, duke shënuar rezultatin më të lartë në Ballkanin Perëndimor. Kosova renditet e dyta me 4,4%.
Këto shifra tregojnë se kërkesa e familjeve vazhdon të mbështesë ekonominë, ndërsa investimet në kapacitete prodhuese, ndërtesa, makineri dhe mjete të tjera afatgjata po zgjerohen më ngadalë.
Një tjetër e dhënë e raportit e bën edhe më të qartë strukturën e rritjes ekonomike.
Administrata publike, arsimi dhe shëndetësia kontribuuan së bashku me 1,4 pikë përqindjeje në rritjen prej 3,6% të ekonomisë. Tregtia, transporti, akomodimi dhe shërbimi ushqimor dhanë 1 pikë përqindjeje.
Industria kontribuoi me vetëm 0,05 pikë përqindjeje, ndërsa bujqësia ndikoi negativisht me 0,4 pikë përqindjeje.
Këtu qëndron një prej problemeve kryesore të modelit ekonomik shqiptar. Sektorët e shërbimeve dhe konsumi mbështesin rritjen, ndërsa industria dhe bujqësia nuk po japin të njëjtin kontribut.
Edhe tregu i punës përmban një tregues që kërkon vëmendje të veçantë.
Sipas raportit, papunësia te të rinjtë e grupmoshës 15-29 vjeç arriti në 17,7% gjatë tremujorit të dytë, nga 15,1% një vit më parë.
Ndërkohë, papunësia e përgjithshme për grupmoshën 15-64 vjeç zbriti në 9,3%.
Pra, ndërsa tregu i përgjithshëm i punës shënon një përmirësim të lehtë, papunësia te të rinjtë po rritet. Kjo diferencë meriton vëmendje, veçanërisht në kushtet kur bizneset raportojnë mungesë të fuqisë punëtore.
Ekspertët europianë evidentojnë gjithashtu se ekonomia shqiptare vazhdon të tërheqë investime të huaja, por një pjesë e madhe e tyre përqendrohet te pasuritë e paluajtshme.
Flukset neto të investimeve të huaja direkte arritën në 6,2% të PBB-së gjatë katër tremujorëve deri në qershor 2026. Përqendrimi i tyre në sektorin e pronave ngre pyetje për ndikimin afatgjatë në industri, teknologji dhe produktivitet.
Raporti regjistron edhe zhvillime pozitive. Borxhi publik zbriti në 49% të PBB-së gjatë tremujorit të dytë, ndërsa bilanci i llogarisë korrente, i matur për katër tremujorët e fundit, kaloi në suficit prej 0,2% të PBB-së, kryesisht falë të ardhurave nga shërbimet dhe turizmi.
Këto përmirësime tregojnë se ekonomia shqiptare ka ruajtur qëndrueshmërinë makroekonomike. Megjithatë, ato nuk e zgjidhin problemin e ngadalësimit të investimeve dhe të kontributit të dobët të sektorëve prodhues.
Në vlerësimin e tyre, ekspertët europianë theksojnë nevojën që Shqipëria të diversifikojë burimet e rritjes ekonomike dhe të përmirësojë mjedisin e biznesit.
Për qeverinë shqiptare, ky është një problem që kërkon përgjigje konkrete. Çfarë po e ngadalëson ritmin e investimeve? Përse industria kontribuon kaq pak në rritjen ekonomike? Çfarë masash po merr Ministria e Ekonomisë për të nxitur investimet prodhuese dhe punësimin e të rinjve?
Interesat ekonomike nuk janë domosdoshmërisht të njëjta. Investitorët në pasuri të paluajtshme kërkojnë kthim financiar nga pronat, ndërsa sipërmarrjet industriale kanë nevojë për tregje, energji të përballueshme, teknologji dhe punonjës të kualifikuar. Qeveria duhet të krijojë kushte që kapitali të gjejë mundësi fitimi edhe në sektorët që prodhojnë mallra dhe vende pune të qëndrueshme.
Raporti i fundit europian jep një mesazh të qartë: Shqipëria ka rritje ekonomike dhe tregues financiarë pozitivë, por investimet po humbasin ritmin, industria kontribuon pak dhe papunësia e të rinjve po rritet.
Këto janë dobësi që kërkojnë politika të matshme ekonomike, jo vetëm objektiva të përgjithshëm për rritjen e PBB-së./Pamfletiekonomia e betonit industria shqiptare vendnumëro Lini një Përgjigje Anuloje përgjigjen Ekonomi Pragu i varfërisë për person 315 euro në muaj, dyfishohet në gjashtë vjet 21 Tetor 2026, 07:2807:28Ekonomi Luhatje në kursin e këmbimit, me sa shiten dhe blihen euro dhe dollari sot 21 Tetor 2026, 07:1807:18Ekonomi Shqipëria, 145 milionë dollarë për digjitalizimin nga Banka Botërore, por vetëm 1 në 8 biznese përdor inteligjencën artificiale! 20 Tetor 2026, 12:3612:36Ekonomi Kursi i këmbimit 20 tetor, me sa shiten dhe blihen euro dhe dollari 20 Tetor 2026, 07:1907:19Ekonomi Shqipëria konsumon, por nuk prodhon: 410 miliardë lekë deficiti tregtar në 9 muaj! 19 Tetor 2026, 14:0414:04Ekonomi Sulmet ndaj bankave dhe bankomatëve në protesta, Banka e Shqipërisë mesazh qytetarëve 19 Tetor 2026, 13:2613:26Ekonomi