James Groves, 51 vjeçari transgjinor, është dënuar me 20 vjet e gjashtë muaj burg për një seri veprash seksuale ndaj një të miture në Britani. Groves, u shpall fajtor për 19 vepra penale, përfshirë nëntë akuza për përdhunim, si dhe për një akuzë për përpjekje për të penguar drejtësinë. Ai u dënua nga Gjykata e Kurorës në Bristol, sipas raportimeve të mediave britanike.
Sipas akuzave të shqyrtuara nga gjykata, ‘viktima’ ishte abuzuar seksualisht në mënyrë të përsëritur gjatë një periudhe prej disa muajsh, ndërsa ajo ishte e mitur.
Gjatë procesit gjyqësor, ‘viktima’ përshkroi pasojat e abuzimit dhe tha se trauma kishte ndikuar rëndë në fëmijërinë dhe jetën e saj.
“Jam vetëm një guaskë e vetes sime të dikurshme. Nuk mbaj mend pjesë të mëdha të fëmijërisë sime për shkak të asaj që bëri Groves dhe traumës që kam përjetuar”, dëshmoi ajo.
“Njerëzit më kanë thënë se nuk jam më vajza e ndritur dhe e gjallë që isha dikur. E kam humbur fëmijërinë time dhe nuk do ta rikthej kurrë”, shtoi ajo.
Gjatë hetimit, ‘viktima’ i tregoi policisë se ishte abuzuar seksualisht nga 51-vjeçari kur ishte e mitur.
Detektivi Ben Perrett, nga Njësia e Hetimeve Kriminale e Policisë së Avon dhe Somerset, e përshkroi rastin si një rast “jashtëzakonisht shqetësues” të abuzimit të vazhdueshëm ndaj një vajze të re.
Sipas tij, Groves e kishte shënjestruar dhe manipuluar viktimën për një periudhë të gjatë, duke përdorur mashtrimin për të fituar besimin e saj dhe për të ushtruar kontroll.
“Do të doja ta përgëzoja viktimën për guximin e saj për të folur dhe për të mbështetur hetimin. Guximi i saj ishte thelbësor për arritjen e këtij dënimi dhe për parandalimin e dëmeve të mëtejshme”, tha Perrett.
Ai shtoi se policia do të vazhdojë të hetojë dhe ndjekë penalisht rastet e abuzimit seksual, veçanërisht kur viktimat janë persona të cenueshëm.
Dënimi i Groves shënon përfundimin e një procesi gjyqësor që përfshiu 19 vepra penale, ndërsa viktima do të duhet të përballet me pasojat afatgjata të abuzimit të përshkruar gjatë gjyqit. Top Channel