Një qytetar i është drejtuar redaksisë së JOQ Albania për të denoncuar situatën pranë Kishës së Shna Ndout në Laç, ku sipas tij, hapësirat përreth janë kthyer në një zonë tregtimi.
Në pamjet e dërguara shihen tavolina, struktura të improvizuara dhe stenda të vendosura në hapësirat e parkimit, ku tregtohen artikuj fetarë, suvenire dhe produkte të ndryshme.
Sipas qytetarit, në këtë zonë mbërrijnë çdo vit besimtarë nga vende të ndryshme të Shqipërisë, katolikë dhe myslimanë, ndërsa gjendja e hapësirave përreth kishës krijon vështirësi për vizitorët.
Ai pretendon se tregtarët nuk i lejojnë besimtarët të parkojnë automjetet dhe se në disa raste ka pasur edhe përplasje verbale. Qytetari ngre gjithashtu një pretendim më të rëndë, duke thënë se disa automjeteve u janë dëmtuar gomat, por kjo mbetet për t’u verifikuar.
Në videon e regjistruar gjatë natës shihen stendat dhe strukturat tregtare të vendosura pranë automjeteve të parkuara, ndërsa hapësira e parkimit duket e zënë në disa pjesë.
Qytetari shprehet i shqetësuar për mungesën e ndërhyrjes nga institucionet vendore dhe kërkon që Bashkia Kurbin dhe strukturat përgjegjëse të verifikojnë situatën, të sqarojnë kriteret për zënien e hapësirave publike dhe të marrin masa nëse konstatohen shkelje.
JOQ Albania publikon denoncimin dhe pamjet e dërguara nga qytetari, ndërsa mbetet e hapur për reagimin e Bashkisë Kurbin dhe tregtarëve të përfshirë. View this post on Instagram A post shared by JOQ News (@joqnews)