Dy gra shqiptare janë arrestuar të mërkurën në Serbi, nën dyshimet për spiunazh dhe për përcjellje të informacioneve rreth pjesëtarëve aktivë të Agjencisë së Inteligjencës së Serbisë (BIA) te Shërbimi Informativ Shtetëror Shqiptar (SHISH), raportojnë mediat serbe.Sipas raportimeve të mediave të afërta me pushtetin në Serbi, arrestimet janë kryer në kuadër të një operacioni të përbashkët të BIA-s, Prokurorisë së Lartë Publike në Jagodinë dhe policive të Vranjës dhe Jagodinës. Në Vranjë është arrestuar një 46-vjeçare, me prejardhje nga Shillova e Gjilanit, ndërsa në Jagodinë është arrestuar një grua 50-vjeçare, e cila banon në këtë qytet.Autoritetet serbe i dyshojnë të dyja për veprën penale të spiunazhit. Sipas pretendimeve të tyre, gratë dyshohet se kanë mbledhur dhe përcjellë te SHISH-i informacione lidhur me pjesëtarë aktivë të BIA-s dhe aktivitetet e tyre.Në raportimet serbe përmendet gjithashtu pretendimi se informacionet dyshohet se u janë përcjellë edhe Agjencisë së Kosovës për Inteligjencë (AKI) dhe njësisë së inteligjencës së Policisë së Kosovës.Gjatë kontrollit të urdhëruar nga gjykata në ambientet e 50-vjeçares së arrestuar në Jagodinë, autoritetet serbe kanë sekuestruar disa sende dhe pajisje elektronike, të cilat, sipas tyre, mund të kenë lidhje me veprën penale për të cilën ajo po hetohet.Nga arrestimi te narrativa e “spiunazhit”Përtej njoftimit për arrestimet, mënyra se si rasti është pasqyruar nga një pjesë e mediave serbe, veçanërisht ato që mbështesin politikën e presidentit Aleksandar Vuçiq, e vendos ngjarjen brenda një kornize më të gjerë sigurie dhe përplasjeje me Kosovën dhe Shqipërinë.Raportimet përcjellin kryesisht versionin e autoriteteve serbe, ndërsa akuzat për spiunazh paraqiten përmes deklarimeve të institucioneve të Serbisë. Në këtë fazë bëhet fjalë për dyshime dhe jo për një përgjegjësi penale të provuar me vendim gjyqësor. Në disa prej këtyre raportimeve, përkatësia shqiptare e njërës prej të arrestuarave dhe lidhjet e pretenduara me institucionet e sigurisë së Kosovës dhe Shqipërisë vendosen në plan të parë, duke e paraqitur rastin si pjesë të një aktiviteti të dyshuar të inteligjencës shqiptare dhe kosovare në territorin e Serbisë.Ky lloj raportimi i jep ngjarjes një dimension politik dhe të sigurisë përtej vetë informacionit fillestar për arrestimin, ndërsa mungojnë në fazën e parë të raportimeve detaje të pavarura që do të mund të vërtetonin akuzat e bëra nga autoritetet serbe.Po ashtu, në raportimet e publikuara nuk paraqitet një version i të arrestuarave apo i përfaqësuesve të tyre ligjorë që do t'u kundërvihej pretendimeve të institucioneve serbe.Rasti pritet të sqarohet përmes procedurës hetimore dhe gjyqësore në Serbi, ndërsa çdo përgjegjësi penale e dy grave do të mund të përcaktohet vetëm pas një vendimi përfundimtar të gjykatës.
