Prej muajsh, protestat në Shqipëri janë paraqitur publikisht si një lëvizje e lindur nga pakënaqësia e qytetarëve: fillimisht kundër projekteve turistike në Zvërnec dhe Vjosa-Nartë, më pas si një revoltë më e gjerë kundër qeverisë dhe, së fundmi, si protestë e studentëve dhe të rinjve. Por një seri deklaratash të publikuara nga vetë Progressive International – Internacionalja Progresiste – tregon se Shqipëria nuk është parë thjesht nga jashtë me simpati. Organizata ndërkombëtare e së majtës ka pasur një anëtare shqiptare të përfshirë drejtpërdrejt në protesta, Lëvizjen Bashkë; drejtues të saj kanë qenë fizikisht në Tiranë; protestat shqiptare janë futur në të njëjtën hartë politike me lëvizje të tjera në Europë dhe botë; ndërsa në një prej komunikatave është bërë edhe thirrje publike për mbledhjen e fondeve në mbështetje të fushatës shqiptare. Asnjë nga këto, më vete apo të marra së bashku, nuk provon ekzistencën e një operacioni të fshehtë ndërkombëtar për organizimin e protestave në Shqipëri. LEXO EDHE:Protestat, Hita inspektime në terren! Porosi efektivëve: Ruani qetësinë, ndihmoni qytetarët në nevojë dhe veproni sipas ligjit Por dokumentet publike ngrenë pyetje të cilave Lëvizja Bashkë, si parti parlamentare dhe si anëtare zyrtare e Progressive International, duhet t’u japë përgjigje. Dokumenti i parë që meriton vëmendje është Briefing nr. 17, i publikuar më 15 qershor 2026. Në të, Shqipëria trajtohet në kuadër të një përballjeje më të gjerë me atë që Progressive International e quan “Reactionary International”. Po në këtë periudhë, organizata promovonte edhe një konsorcium kërkimor ndërkombëtar që analizonte rrjetet politike, ekonomike dhe financiare të forcave që ajo konsideron kundërshtare. Dy javë më vonë, më 29 qershor, lidhja me Shqipërinë bëhet shumë më konkrete. Në Briefing nr. 19, me titull “Albania Is Not For Sale”, Progressive International e përshkruan protestën e flamingove si një “kryengritje kombëtare” dhe konfirmon se koordinatori i përgjithshëm i saj, David Adler, kishte qenë personalisht në Tiranë “me aktivistët e Lëvizjes Bashkë”, të cilën organizata e identifikon shprehimisht si anëtare të saj. Pra, nuk kemi vetëm një organizatë të huaj që ka lexuar lajmet nga Tirana dhe ka publikuar një deklaratë solidariteti. Një prej drejtuesve më të lartë të saj ishte në terren me aktivistët e një partie politike shqiptare. Në të njëjtën komunikatë citohet edhe kryetari i Lëvizjes Bashkë, Arlind Qori. Progressive International shkruan se puna shumëvjeçare e partisë “ka ndihmuar të sjellë mijëra njerëz në rrugë” dhe e paraqet Shqipërinë si një nga frontet e përballjes së saj globale me atë që ajo quan oligarki ndërkombëtare. Vetë faqja zyrtare e Progressive International e liston Lëvizjen Bashkë mes organizatave të saj anëtare dhe e përshkruan si një parti politike të majtë në Shqipëri. (progressive.international) Por pjesa që kërkon më shumë transparencë gjendet në fund të komunikatës së 29 qershorit. Pas mbështetjes së hapur për Lëvizjen Bashkë dhe protestën në Shqipëri, Progressive International u kërkon lexuesve të mbështesin financiarisht fushatën. Teksti flet konkretisht për donacione prej 10, 20 apo 50 dollarësh dhe thotë se këto para ndihmojnë në vazhdimin e “luftës”, ndërsa qeveria Rama, sipas formulimit të organizatës, përpiqet ta shtypë atë. Lidhja e vendosur në artikull çon te një faqe e jashtme për mbledhje fondesh. Këtu lind pyetja më e thjeshtë dhe njëkohësisht më e rëndësishme: ku kanë përfunduar këto para? A ka përfituar Lëvizja Bashkë, drejtpërdrejt ose tërthorazi, nga donacionet e mbledhura për fushatën shqiptare? Nëse po, sa është shuma totale? Në çfarë forme janë transferuar fondet? A janë deklaruar pranë institucioneve shqiptare? Për çfarë janë përdorur: transport, materiale proteste, organizim, komunikim, staf, fushata online apo aktivitete të tjera? Nëse Lëvizja Bashkë nuk ka marrë asnjë qindarkë, atëherë kush i ka administruar fondet e mbledhura nën një artikull që fliste specifikisht për protestat në Shqipëri dhe që shprehte mbështetje të drejtpërdrejtë për këtë parti? Dokumentet e disponueshme publikisht që shqyrtoi TemA nuk japin përgjigje për këto pyetje. Ato provojnë ekzistencën e thirrjes për donacione, por jo destinacionin përfundimtar të parave. Pikërisht për këtë arsye përgjigjja duhet të vijë nga Lëvizja Bashkë, nga Arlind Qori dhe nga deputeti i saj Redi Muçi. Historia nuk mbaron në qershor. Më 31 korrik, Progressive International vazhdonte ta trajtonte Lëvizjen Bashkë si pjesë të protestave shqiptare, duke raportuar arrestimin e anëtarëve të saj gjatë tubimeve dhe duke e quajtur atë sërish organizatë anëtare të Internacionales. Pastaj vjen dokumenti më interesant për zhvillimet e tetorit. Më 16 tetor, vetëm një ditë përpara protestës së 17 tetorit që u shoqërua me dhunë të rëndë në Tiranë, Progressive International publikoi Briefing nr. 32, “When the Bargain Breaks”. Në të njëjtin dokument, protestat në Spanjë, Francë, Indi dhe Shqipëri trajtohen si pjesë e një vale të përbashkët revoltash sociale. Për Shqipërinë, organizata shkruan se protestat e flamingove ishin shndërruar në revoltë kundër korrupsionit dhe oligarkëve dhe se studentët që protestonin për arsimin dhe koston e jetesës i ishin bashkuar tashmë kësaj lëvizjeje. Më pas dokumenti shkon përtej përshkrimit. Progressive International shpjegon se Lëvizja Bashkë po ndërton mbi vite organizimi me punëtorë, qiramarrës dhe studentë dhe e vendos atë krahas lëvizjeve të tjera në Spanjë, Francë dhe Indi. Fjalia kyçe vjen menjëherë më pas: këto, shkruan organizata, janë “forcat” që Progressive International po punon “t’i mbështesë dhe t’i lidhë”. Edhe kjo nuk është provë se dikush jashtë Shqipërisë ka komanduar protestën e 17 tetorit. Por është një deklaratë politike e shkruar bardhë mbi të zezë nga vetë organizata: ajo synon të mbështesë dhe të lidhë mes tyre partitë, lëvizjet studentore, organizatat e qiramarrësve dhe sindikatat që po marrin pjesë në revolta të ndryshme kombëtare. Dhe një prej këtyre forcave është Lëvizja Bashkë. Kjo krijon një tjetër seri pyetjesh. Çfarë do të thotë në praktikë “support and connect” për Lëvizjen Bashkë? A ka pasur mbështetje financiare? A ka pasur asistencë për organizimin e protestave, komunikimin publik apo fushatat dixhitale? A ka pasur trajnime, konsulencë, shkëmbim strategjish apo koordinim me organizata të tjera anëtare? Cili ishte qëllimi i vizitës së David Adler në Tiranë dhe cilat aktivitete zhvilloi ai me Lëvizjen Bashkë? Sa herë kanë ardhur përfaqësues të Progressive International në Shqipëri gjatë protestave të vitit 2026? Dhe mbi të gjitha: a ka marrë Lëvizja Bashkë ndonjë financim, shërbim apo mbështetje materiale nga Progressive International ose nga fushatat e promovuara prej saj? Transparenca për këto çështje nuk do të thotë kriminalizim i lidhjeve ndërkombëtare. Partitë politike, sindikatat dhe organizatat e shoqërisë civile bashkëpunojnë me rrjete të huaja në të gjithë Europën. Edhe vetë anëtarësimi i Lëvizjes Bashkë në Progressive International është publik dhe jo sekret. Problemi lind kur një organizatë ndërkombëtare deklaron se po punon për të “mbështetur dhe lidhur” lëvizje politike në vende të ndryshme, vendos drejtuesit e saj në terren me një parti shqiptare, mbledh para në kontekstin e protestave në Shqipëri dhe nuk është e qartë për publikun shqiptar se çfarë forme merr konkretisht kjo mbështetje. Sidomos kur, katër muaj më vonë, e njëjta organizatë i vendos protestat shqiptare në të njëjtën strategji politike me revoltat në Francë, Spanjë dhe Indi. Nuk kemi prova që Progressive International ka organizuar dhunën e 17 tetorit. Nuk kemi prova që paratë e mbledhura jashtë vendit kanë financuar protestues apo aktivitete të paligjshme. Dhe nga dokumentet publike nuk mund të thuhet se ekziston një qendër ndërkombëtare që komandon protestat shqiptare. Por kemi prova të një marrëdhënieje politike dhe organizative që vetë palët e deklarojnë publikisht. Për këtë arsye, çështja që mbetet për t’u sqaruar është konkrete: çfarë forme ka marrë kjo mbështetje në praktikë? A ka pasur financim të drejtpërdrejtë apo të tërthortë për Lëvizjen Bashkë? Nëse po, në çfarë shume dhe për çfarë aktivitetesh? Nëse jo, kush i ka administruar fondet e mbledhura për fushatën shqiptare? Po aq e rëndësishme është të sqarohet se çfarë nënkupton në praktikë deklarata e Progressive International se po punon për t’i “mbështetur dhe lidhur” këto forca në vende të ndryshme. Këto janë pyetje që mund të marrin përgjigje të thjeshta dhe të verifikueshme nga vetë Lëvizja Bashkë. Transparenca mbi to do të ndihmonte edhe për të ndarë faktet nga interpretimet që kanë shoqëruar protestat e muajve të fundit./ Tema A.C/P.J/Shqiptarja.com TAG: protestat kunder qeverise Progressive International arlind qori Lëvizja Bashkë Sa e vlerësoni këtë artikull? ★ ★ ★ ★ ★ 3.7 / 5 (3 vlerësime) Faleminderit! LAJMET MË TË VLERËSUARA Komente Komento Arta: 24/10/2026 08:47 Po cfare Qorri ai vetem sa ka emrin dhe protesten e nise flamingot pastaj,e gjitha eshte puna e plakut mere dhe skuthit e hajdutit me shkolle Shehut qe u shkeput nga plaku mere me lejen e tij qe te krijonte elektorat e me pas do te bejne aleance me plakun mere kur ps te dobesohet Përgjigju Mara emigrante ne Itali: 24/10/2026 10:42 Protesta e flamingove u fillua nga sazan guri ambientalisti qe donte te çonte lladhen shqipetare ne UNESKO ( i cili perkrah pd .)dhe me ndihmen e bejlerit .me vone pas 1 muaji i nxoren kembet qe nuk ishte per flamingot .Si mundet qe te protestosh per nje veper qe nuk eshte bere , nuk ka nje vendim nga Keshilli i Ministrave ? Kuptohet qe qellimi ishte per destabilizim te Shqiperise , prishjen e imazhit per turizmin .Qe kane perfituar qorri , ( zbuloni ku punon gruaja e qorrit ,) shehaj llapaj as nuk diskutohet . Protesta do te deshtoj si kane deshtuar gjithmon protestat e pd .Populli duhet te ngrihet kunder prokuroreve dhe gjyqtarve qe mbrojne kriminelet e shkaterimit te prones . Sondazhi i ditës:
15 Tetor, 13:43
A i mbështesni protestat e dhunshme në vend? Po 18.7% Jo 78.4% Disi 2.9% Vota total: 13383 Votat totale janë unike Sondazhi i ditës: 15 Tetor, 13:43 A i mbështesni protestat e dhunshme në vend?