Angjelin Sterkaj, i dënuar me 16 vite burg nga Gjykata e Lartë e Islandës për vrasjen e Armando Beqirajt në Reykjavík në vitin 2021, ka përfituar lirimin me kusht dhe është dëbuar nga Islanda. Atij i është ndaluar rikthimi në Islandë dhe në të gjithë zonën Schengen. Vendimi është konfirmuar nga autoritetet islandeze dhe lidhet me një ndryshim të përkohshëm të ligjit, që lejon lirimin me kusht të të burgosurve të huaj që kanë vuajtur të paktën një të tretën e dënimit dhe ndaj të cilëve është vendosur dëbimi.
Sterkaj kishte vuajtur gjithsej 2,004 ditë, ose rreth 5 vite e gjysmë, në paraburgim dhe burgim, duke kaluar pragun e një të tretës së dënimit 16-vjeçar. Sipas autoriteteve, vendimi për lirimin me kusht merret pas vlerësimit të disa faktorëve, përfshirë sjelljen gjatë vuajtjes së dënimit dhe rrezikshmërinë. Pas lirimit, të burgosurit e huaj shoqërohen deri në vendin e origjinës nga autoritetet përkatëse islandeze.
Armando Beqiraj, 33 vjeç, u vra më 13 shkurt 2021 pranë banesës së tij në Reykjavík, pasi ishte kthyer në shtëpi. Sterkaj u dënua me 16 vite burg për vrasjen, ndërsa bashkëpunëtorët e tij morën dënime nga 3 deri në 10 vite. Në Shqipëri, Sterkaj ishte raportuar gjithashtu si person i kërkuar për vepra penale, ndërsa autoritetet islandeze sqarojnë se procedura e lirimit me kusht dhe dëbimit nuk lidhet me procesin e ekstradimit.