Një teknologji e re që përdor inteligjencën artificiale për të analizuar ndryshimet në të folur mund të ndihmojë në identifikimin e personave me rrezik për diabet të tipit 2 brenda vetëm pak sekondash, sugjeron një studim i ri. Studiuesit thonë se teknologjia mund të hapë një rrugë të re për depistimin e diabetit, pasi regjistrimet e zërit mund të merren lehtësisht përmes telefonit ose një aplikacioni.Lexo edhe:MRI mund të zbulojë shenja të Alzheimerit më herët Vetëm në Mbretërinë e Bashkuar, sipas Diabetes UK, më shumë se gjashtë milionë njerëz jetojnë me diabet. Megjithatë, vetëm rreth 4.7 milionë prej tyre kanë një diagnozë zyrtare, ndërsa një numër i konsiderueshëm njerëzish mund ta kenë sëmundjen pa qenë të vetëdijshëm. Simptomat e diabetit mund të zhvillohen gradualisht. Lodhja, etja e tepruar dhe shenja të tjera shpesh nuk vërehen menjëherë, duke bërë që diagnoza të vonohet. Mungesa e kontrolleve të rregullta shëndetësore dhe qasja e kufizuar në testime mund të bëjnë gjithashtu që disa persona me rrezik të mos kryejnë analizat e nevojshme të gjakut. Teknologjia e re, e zhvilluar nga kompania thymia në bashkëpunim me RMIT University në Melbourne të Australisë, përdor inteligjencën artificiale për të identifikuar karakteristika të të folurit që janë lidhur me diabetin e tipit 2. Sipas studiuesve, tendosja e zërit, ngjirja më e theksuar dhe ndryshimet në kontrollin e frymëmarrjes mund të jenë disa prej sinjaleve që sistemi është në gjendje të analizojë. Tek personat me kontroll të dobët të sheqerit në gjak mund të shfaqen ndryshime në cilësinë e zërit. Nivelet e larta të glukozës mund të ndikojnë në nerva, përfshirë nervin vagus, i cili luan rol edhe në kontrollin e muskujve të laringut. Personat me diabet mund të kenë gjithashtu më shpesh refluks të acidit të stomakut, i cili mund të irritojë kordat vokale dhe të shkaktojë ngjirje. Ndryshimet në funksionin e mushkërive mund të ndikojnë gjithashtu në rrjedhën e ajrit të nevojshme për të folur qartë. Për të mësuar të dallojë ndryshimet shumë të vogla në zë, modeli i inteligjencës artificiale u trajnua me më shumë se 63 mijë mostra zanore nga mbi 21 mijë persona në Mbretërinë e Bashkuar dhe Shtetet e Bashkuara. Më pas, sistemi u testua duke përdorur regjistrime rreth 20-sekondëshe të personave që lexonin me zë të lartë fabulat e Ezopit. Në analizën që përfshiu 7,319 persona në Mbretërinë e Bashkuar, modeli u dha rezultate më të larta rreziku personave që raportuan se kishin diabet të tipit 2 në rreth 80 për qind të rasteve. Sistemi tregoi rezultate relativisht të qëndrueshme në grupmosha dhe gjini të ndryshme. Megjithatë, performanca ishte më e dobët te pjesëmarrësit me ngjyrë, gjë që studiuesit e lidhën me numrin më të vogël të personave të këtij grupi të përfshirë në të dhënat e studimit. Një analizë tjetër përfshiu 801 persona që kishin kryer analiza gjaku për diabetin në shtëpi, brenda tre muajve nga regjistrimi i zërit. Në këtë grup, sistemi i inteligjencës artificiale u dha rezultate më të larta rreziku personave me tregues të diabetit në rreth 75 për qind të rasteve. Diabeti zakonisht diagnostikohet përmes analizave të gjakut që matin nivelet e glukozës ose tregues si HbA1c, i cili pasqyron mesataren e sheqerit në gjak gjatë muajve të fundit. Giedre Cepukaityte, shkencëtare kërkimore në thymia, tha se teknologjia ka potencialin të ndryshojë mënyrën se si bëhet depistimi për diabetin e tipit 2. “Një mostër zëri mund të merret përmes telefonit ose një aplikacioni, kështu që mund të arrijmë shumë më tepër njerëz që kanë nevojë për analiza gjaku, veçanërisht ata që nuk paraqiten për kontrolle shëndetësore”, tha ajo. Megjithatë, studiuesit theksojnë se teknologjia nuk është zëvendësim për analizën e gjakut dhe nuk jep vetë një diagnozë përfundimtare. Sipas Cepukaityte, qëllimi është që sistemi të përdoret si mjet depistimi për të identifikuar personat që mund të kenë nevojë për analiza të mëtejshme. Hapi i ardhshëm do të jetë testimi i teknologjisë në ambiente klinike dhe vlerësimi i saktësisë së saj në grupe të ndryshme të popullsisë. Studiuesit thonë se kjo është veçanërisht e rëndësishme, pasi një mjet depistimi duhet të funksionojë në mënyrë të besueshme për të gjithë pacientët përpara se të mund të përdoret gjerësisht në praktikën mjekësore.
