Giorgio Chiellini ka hedhur poshtë zërat e ditëve të fundit që e lidhnin atë me marrjen e postit të drejtorit të ri teknik të kombëtares italiane të futbollit. Gjatë një prononcimi të shkurtër të dhënë përpara mbledhjes së Këshillit të Federatës Italiane të Futbollit (FIGC), ish-kapiteni legjendar ka sqaruar përfundimisht pozicionin dhe të ardhmen e tij. Chiellini, i cili aktualisht mban postin e rëndësishëm të Drejtorit për Çështjet e Klubit (Chief Club Affairs Officer) te Juventusi si dhe atë të Këshilltarit Federal, theksoi se vëmendja e tij mbetet e palëkundur te skuadra bardhezi.
“Në lidhje me atë që është përfolur gjatë këtyre ditëve,” u shpreh Chiellini para gazetarëve, “dua të saktësoj se jam shumë i lumtur me rolin tim te Juventusi.”
Për të përforcuar angazhimin e tij në projektin e klubit torinez, ai shtoi: “Dua të jem në mbështetje të drejtorit Carnevali.” Me këto deklarata të prera, Chiellini i jep fund spekulimeve për një rikthim të mundshëm në stafin drejtues të “Të Kaltërve”, duke konfirmuar besnikërinë dhe përqendrimin e tij total në mbështetje të hierarkisë së re drejtuese te “Zonja e Vjetër”. Top Channel