Magjia e netëve europiane është rikthyer aty ku i takon. Sezoni i ri i UEFA Champions League ka ngritur siparin ekskluzivisht në ekranin e Top Channel, duke sjellë emocionet e para me sfidën e fazës Play-Off mes Celtic dhe austriakëve të LASK. Në mitikun Celtic Park, kampionët skocezë nuk zhgënjyen, duke hedhur një hap të sigurt drejt kualifikimit në fazën e grupeve pas një fitoreje të pastër 3-0. Takimi i parë i këtij sezoni të ri televiziv të Champions League nisi me një ritëm të lartë nga vendasit, të cilët gjetën rrugën e rrjetës në minutën e 26-të. Ishte Nygren ai që zhbllokoi shifrat, duke ndezur entuziazmin e tifozëve në shkallët e stadiumit.
Dominimi i Celtic vazhdoi dhe në skenë doli Duran, i cili u shndërrua në protagonistin absolut të mbrëmjes. Sulmuesi dyfishoi avantazhin në minutën e 38-të pas një aksioni të rrjedhshëm, për ta dërguar skuadrën të qetë në dhomat e zhveshjes.
Në pjesën e dytë, austriakët e LASK u munduan të reagonin, por ishte sërish Celtic që diktoi tempin. Në minutën e 67-të, Duran gjeti sërish rrugën e rrjetës duke shënuar golin e tij të dytë personal dhe duke vulosur rezultatin përfundimtar në 3-0.
Ndeshja e kthimit, e cila do të vendosë përfundimisht se cila skuadër do të presë biletën për në fazën e grupeve, do të luhet më 24 gusht dhe sigurisht, do të vijojë të transmetohet drejtpërdrejt dhe ekskluzivisht në ekranin e Top Channel.
Në ndeshjet e tjera të kësaj të mërkure, Bodo/Glimt është me një këmbë në fazën e Ligës, teksa fitoi në transfertë ndaj Nijmengen me rezultatin 3-1. Fitore shënoi edhe Hapoel Beersheva ndaj Sabah, me rezultatin 2-1, ndërsa Slovan Bratislava dhe Celje e mbyllën sfidën mes tyre në barazim 1-1. Top Channel