Raundi i parë i zgjedhjeve lokale mbajtur më 20 tetor 1996 u fitua masivisht nga kandidatë të PD-së,partisë që ishte në pushtet. Disa bashki të mëdha kishin kaluar në balotazh ndërsa Tiranën e kishte fituar Albert Brojka i demokratëve përballë socialistit Agim Fagu. Me fokusin tek rezultatet e zgjedhjeve Gazeta Shqiptare në numrin e datës 22 tetor 1996-të shkruan në faqe të parë: “ Zgjedhjet, kush fitoi e kush humbi” duke nënvizuar se PS në opozitë akuzonte për manipulime ndërsa PD kishte marrë mbi 60 % të votave. Ndërkaq po me të njëjtin argument titulli kryesor i Koha Jonë ishte ky: “ Kapitullim i opozitës”. Element i rëndësishëm që theksohej ishte pjesmarrja e ulët në votime.
