Një marrëveshje mes Britanisë së Madhe dhe Shqipërisë, e cila synonte transferimin në Shqipëri të rreth 200 të burgosurve shqiptarë që vuajnë dënime në burgjet britanike, ka dhënë rezultate shumë më të ulëta nga sa ishte parashikuar. Sipas një raportimi të "Daily Mail", që nga nënshkrimi i marrëveshjes në vitin 2023, vetëm 13 të burgosur shqiptarë janë transferuar në Shqipëri, ndërsa objektivi fillestar ishte rreth 200 persona.
Marrëveshja e transferimit të të burgosurve u hartua me qëllim lehtësimin e mbipopullimit të burgjeve britanike dhe uljen e kostove për shtetin, duke u mundësuar shtetasve shqiptarë të vazhdojnë vuajtjen e dënimit në vendin e tyre.
Shqiptarët përbëjnë aktualisht grupin më të madh të shtetasve të huaj në burgjet britanike. Sipas shifrave të cituara në raportim, rreth 1,000 shqiptarë ndodhen pas hekurave në Britani, duke përbërë rreth 10% të të burgosurve me shtetësi jo-britanike.
Marrëveshja mund të zbatohet edhe për persona të dënuar për krime të rënda, përfshirë vrasje, por transferimi kërkon miratimin e autoriteteve të të dyja vendeve dhe përmbushjen e procedurave ligjore.
Një burim i Ministrisë shqiptare të Drejtësisë citohet të ketë deklaruar se synimi ishte transferimi i 200 të burgosurve që vuajnë dënime mbi katër vite, por deri tani vetëm 13 raste janë përfunduar.
Pengesat që kanë ngadalësuar transferimet
Një nga problemet kryesore të evidentuara është procedura ligjore në Shqipëri. Sipas raportimit, në disa raste dokumentacioni i nevojshëm nuk është përfunduar nga gjykatat shqiptare, duke krijuar një numër çështjesh të prapambetura dhe duke vonuar transferimet.
Për të mundësuar funksionimin e marrëveshjes, Britania e Madhe ra dakord t’i paguante Shqipërisë 8 milionë paund për dy vite, me qëllim përmirësimin dhe rikonstruksionin e burgjeve shqiptare.
Pas transferimit, qeveria shqiptare merr gjithashtu pagesa për kostot e mbajtjes së të burgosurve, të llogaritura në bazë të numrit të ditëve të vuajtjes së dënimit në burg.
Ndërkohë, mbajtja e një të burgosuri në sistemin penitenciar britanik kushton rreth 56 mijë paund në vit. Për personat që vuajnë dënime shumë të gjata, kostoja totale për taksapaguesit britanikë mund të arrijë në miliona paund.
Në raportim përmenden si shembuj Erland Spahiu dhe Ali Qazimaj, të dy të dënuar me nga 35 vite burg për vrasje.
Në listën e të dënuarve shqiptarë të përmendur është edhe Koci Selamaj, i cili u dënua me minimumi 36 vite për vrasjen e mësueses Sabina Nessa në Londër në vitin 2021. Ai ndodhet në Broadmoor Hospital dhe, sipas raportimit, do të transferohet në sistemin e burgjeve kur të vlerësohet i aftë për këtë.
Një nga të parët që u transferua ishte një trafikant droge
Një nga shqiptarët e parë të kthyer në Shqipëri ishte Klodjan Copja, i dënuar me 17 vite burg në vitin 2017 për trafikim kokaine.
Sipas raportimit, Copja konsiderohej drejtues i një rrjeti të madh të furnizimit me kokainë, i cili dyshohej se kishte importuar drogë me vlerë rreth 60 milionë paund në Britani.
Në të njëjtin hetim u dënuan 42 persona me një total prej 360 vitesh burg.
Qeveria britanike ka deklaruar se marrëveshjet e transferimit të të burgosurve janë vetëm një nga mekanizmat që përdoren për largimin e shtetasve të huaj të dënuar.
Sipas një zëdhënëseje të qeverisë, mbi 11.700 persona janë larguar nga Britania që prej korrikut 2024, ndërsa kthimet dhe dëbimet kanë arritur nivelin më të lartë në gati një dekadë. Kontakto me Politiko në rast se: Mendoni se nuk shkruajmë Shqip Mendoni se kemi bërë shkelje etike Mendoni se kemi bërë CopyPaste Mendoni se kemi bërë FakeNews Doni të postoni nje Lajm