Bashkimi Evropian ka mirëpritur vendimin e presidentes së Kosovës, Justina Shiroka Pula, për ta kthyer në Kuvend për rishqyrtim ligjin për Dhomat e Specializuara. Në reagimin e tij, BE-ja ka ritheksuar shqetësimin për ndryshimet e miratuara dhe ka kërkuar respektimin e pavarësisë së Gjykatës Speciale, sundimit të ligjit dhe të drejtave të viktimave e dëshmitarëve të luftës.
Reagimi i plotë: BE-ja ka shprehur vazhdimisht shqetësimin e saj të thellë lidhur me nismën për ndryshimin e Ligjit për Dhomat e Specializuara të Kosovës, si përpara, ashtu edhe pas miratimit të tij nga Kuvendi i Kosovës më 6 tetor 2026.
Në frymën e shkëmbimit të letrave të vitit 2014 ndërmjet Përfaqësueses së Lartë të BE-së dhe presidentit të Kosovës, ku përcaktohen modalitetet e konsultimit me BE-në përpara ndryshimit të legjislacionit, ne presim që Bashkimi Evropian të konsultohet nëse diskutimet rifillojnë në Kuvend.
Sundimi i ligjit dhe mbrojtja e të drejtave themelore, përfshirë të drejtat e viktimave dhe dëshmitarëve, mbeten me rëndësi thelbësore.
Dhomat e Specializuara të Kosovës janë një institucion i pavarur gjyqësor, i krijuar me vendimet e Kuvendit të Kosovës gjatë viteve 2014–2015, në bazë të një marrëveshjeje të posaçme me Bashkimin Evropian. Ato funksionojnë brenda sistemit juridik të Kosovës dhe janë të përfshira në Kushtetutën e Kosovës.
Mandati aktual dhe pavarësia e këtij institucioni duhet të respektohen plotësisht dhe pa asnjë rezervë.
Bashkimi Evropian shpreh solidaritetin e tij me të gjitha viktimat, të mbijetuarit dhe familjet e tyre, nga të gjitha komunitetet e prekura nga mizoritë e kryera gjatë luftës. Top Channel