Një qytetar ka denoncuar në redaksinë tonë një situatë që, sipas tij, tregon një standard të dyfishtë në menaxhimin e hapësirave të parkimit në qytet.
Ai ka treguar se kur banorët njoftojnë Bashkinë e Tiranës për automjetet që parkojnë para garazheve dhe bllokojnë hyrje-daljet e banesave private, shërbimi i karrotrecit nuk ndërhyn për largimin e tyre.
Por, sipas qytetarit, mjafton që banorët të vendosin disa bidona me ujë dhe karrige për të penguar parkimin e makinave në atë hapësirë dhe ndërhyrja është e menjëhershme. Ditën e sotme punonjësit e Policisë Bashkiake kanë shkuar në lagje dhe kanë hequr bidonat e ujit së bashku me karriget e vendosura për bllokimin e hyrjeve-daljeve nga banesa.
“Kur lajmërojmë Bashkinë për makinat që bllokojnë hyrjen e garazhit, karrotreci nuk vjen. Por kur vendosim bidona që makinat të mos parkohen, vijnë dhe i heqin bidonat bashkë me karriget”, shprehet qytetari.
Ai thekson se bidonat nuk pengojnë kalimin e këmbësorëve, ndërsa makinat e parkuara në atë hapësirë bllokojnë hyrjen dhe daljen e garazhit.
Qytetari kërkon ndërhyrjen e institucioneve për të zgjidhur problemin pasi kjo situatë s’mund të vazhdojë më kështu.