Albert Sylaj, i dyshuar për vrasjen e ish-kunatës së tij, Arlinda Zekaj, është arrestuar nga Policia e Kosovës, tri ditë pas ngjarjes së rëndë të ndodhur më 25 tetor në fshatin Vitomiricë të Pejës. I dyshuari, i cili ishte shpallur në kërkim për veprën penale “Vrasje e rëndë”, u lokalizua pas disa ditësh në arrati.
Arrestimi u realizua pas një aksioni policor në zonën malore të Becit, në Gjakovë, ku në operacion morën pjesë forca të shumta të Policisë së Kosovës, përfshirë edhe njësitin special FIT. Pas krimit të dyshuar, Sylaj ishte larguar nga vendi i ngjarjes, ndërsa autoritetet vijuan kërkimet për kapjen e tij. Gjatë ditëve të fundit, raportimet kishin ngritur dyshime për lëvizjet e tij të mundshme në Prishtinë dhe për mundësinë e largimit drejt Serbisë.
Arlinda Zekaj dyshohet se u vra me sëpatë të dielën mbrëma, më 25 tetor, vetëm pak minuta pasi ishte kthyer në shtëpi nga Stacioni Policor në Pejë, ku kishte raportuar dhunë në familje. Arrestimi i Sylajt pritet të pasohet nga veprimet e mëtejshme hetimore dhe procedurale në koordinim me organet e drejtësisë, për të zbardhur plotësisht rrethanat e ngjarjes.