Partia Demokratike ka ngritur akuza për procedurën e prokurimit për blerjen e tre avionëve për shuarjen e zjarreve me vlerë rreth 15 milionë euro, duke kërkuar anulimin e tenderit dhe nisjen e hetimeve nga SPAK. PD deklaroi se dokumentet e publikuara në media mbi tenderin ngrejnë pikëpyetje mbi mënyrën se si qeveria menaxhon fondet publike dhe sigurinë kombëtare.
Sipas PD-së, kompania e shpallur fituese Air Tractor Europe S.L. është përfshirë në procese gjyqësore në Spanjë që lidhen me manipulime tenderësh dhe korrupsion në sektorin e avionëve për shuarjen e zjarreve. Partia Demokratike pretendon se këto çështje duhet të ishin marrë në konsideratë gjatë procedurës së prokurimit.
Për këtë arsye, opozita kërkon anulimin e menjëhershëm të procedurës dhe hetim të thelluar për përgjegjësit e përfshirë.
Ministria e Mbrojtjes ka kundërshtuar akuzat e Partisë Demokratike, duke deklaruar se procedura është zhvilluar në përputhje me ligjin shqiptar për prokurimet në fushën e mbrojtjes dhe sigurisë, mbi bazën e parimeve të transparencës, konkurrencës dhe trajtimit të barabartë.
Ministria mohoi pretendimet për një “tender të mbyllur”, duke sqaruar se në garë kanë marrë pjesë dy operatorë ekonomikë dhe se kompania fituese është përzgjedhur pasi ka paraqitur ofertën me çmimin më të ulët.
Sipas Ministrisë së Mbrojtjes, operatori tjetër është skualifikuar për shkak se nuk plotësonte kriteret ligjore të kualifikimit, kapacitetit ekonomik dhe teknik.
Sa i përket pretendimeve për kompaninë fituese, Ministria deklaron se AVIATION TRADE EUROPE, S.L. ka paraqitur certifikatën e regjistrit penal që vërteton mungesën e rekordeve penale dhe se nuk ka ndalim ligjor për pjesëmarrje në procedura prokurimi.
Ministria argumenton se çështjet e përmendura në media lidhen me një proces gjyqësor në Spanjë që, sipas saj, nuk ka marrë ende formë të prerë dhe nuk prodhon efekte juridike për përjashtimin e kompanisë nga procedurat publike.
Në reagimin e saj, Ministria e Mbrojtjes thekson gjithashtu se kompania ka vijuar të kontraktojë me institucione të vendeve anëtare të NATO-s dhe partnerë të tjerë ndërkombëtarë.
Sipas Ministrisë, blerja e tre avionëve për shuarjen e zjarreve është një investim strategjik për rritjen e kapaciteteve të reagimit ndaj emergjencave dhe mbrojtjen e qytetarëve, pronës dhe mjedisit. Top Channel