Më shumë se 100 akademikë të lidhur me universitete dhe institucione kërkimore britanike dyshohet se kanë kontribuar pa dijeninë e tyre në projekte të lidhura me operacionet kineze të inteligjencës, përmes një organizate që MI5 e konsideron të lidhur ngushtë me shërbimet kineze të sigurisë. Në një paralajmërim të pazakontë publik, shërbimi britanik i sigurisë u ka kërkuar universiteteve dhe studiuesve të rishikojnë menjëherë çdo bashkëpunim me Institutin Kinez për Kërkime të Teknologjisë së Përgjithshme (CGTRI), i njohur edhe si CAGT. Sipas MI5, organizata ka “lidhje shumë të forta” me Ministrinë Kineze të Sigurisë Shtetërore (MSS) dhe ka financuar kërkime në fusha të ndjeshme, përfshirë inteligjencën artificiale, sigurinë kibernetike, komunikimet e fshehta dhe steganografinë. “MI5 ka përcaktuar se qëllimi kryesor i CGTRI është të financojë kërkime akademike që rrisin drejtpërdrejt aftësitë teknike të MSS në fushën e spiunazhit”, thuhet në paralajmërim. Shërbimi britanik paralajmëron gjithashtu se vazhdimi i bashkëpunimeve të tilla, në rrethana të caktuara, mund të sjellë pasoja ligjore sipas Aktit të Sigurisë Kombëtare të vitit 2023. Ministri britanik i Sigurisë, Dan Jarvis, u ka kërkuar universiteteve të ndërpresin marrëdhëniet me CGTRI-në, duke e cilësuar aktivitetin e dyshuar si rrezik për sigurinë kombëtare të Britanisë dhe aleatëve të saj.
Ndërkohë, Universities UK ka deklaruar se po shqyrton paralajmërimin dhe se universitetet i marrin seriozisht përgjegjësitë për sigurinë e kërkimeve dhe bashkëpunimeve ndërkombëtare.
Kina i ka hedhur poshtë akuzat. Një zëdhënës i ambasadës kineze në Londër i cilësoi ato si “fantastike dhe plotësisht të sajuara”, duke argumentuar se bashkëpunimi akademik mes dy vendeve zhvillohet në mënyrë vullnetare dhe në përputhje me ligjet.
Pekini i ka bërë thirrje gjithashtu palës britanike të ndalojë atë që e konsideron përhapje të informacionit të rremë dhe dëmtim të bashkëpunimit arsimor dhe kërkimor mes dy vendeve. © BalkanWeb Për t’u bërë pjesë e grupit "Balkanweb" mjafton të klikoni: Join Group dhe kërkesa do t’ju aprovohet menjëherë. Grupi Balkanweb