FIFA ka reaguar ashpër ndaj polemikave që kanë përfshirë drejtimin e Gianni Infantinos dhe zgjedhjet e ardhshme në krye të organizatës më të madhe të futbollit botëror. Në një deklaratë zyrtare, FIFA thekson se çdo proces zgjedhor duhet të respektojë statutin e saj, procedurat demokratike dhe kuadrin ekzistues të qeverisjes.
Në një moment kur po shtohen diskutimet rreth të ardhmes së drejtimit të FIFA-s dhe mandatit të Gianni Infantinos, institucioni ndërkombëtar i futbollit ka dalë publikisht në mbrojtje të presidentit të saj.
Deklarata vjen pas qëndrimeve të fundit të CONMEBOL dhe CAF, si edhe pas diskutimeve me federata anëtare dhe konfederata të ndryshme në mbarë botën.
“Duke reflektuar deklaratat e fundit të CONMEBOL dhe CAF, si edhe diskutimet me federatat anëtare të FIFA-s dhe konfederatat në të gjithë botën, FIFA nuk do të mbështesë, lehtësojë apo tolerojë asnjë proces lidhur me zgjedhjen e presidentit të FIFA-s që nuk është në përputhje me Statutin e FIFA-s, procedurat demokratike dhe kuadrin e përcaktuar të qeverisjes”, thuhet në deklaratën e një zëdhënësi të FIFA-s.
Institucioni nënvizon gjithashtu se Gianni Infantino është zgjedhur në mënyrë demokratike nga federatat anëtare të FIFA-s dhe vazhdon të ushtrojë mandatin e tij.
Në deklaratë, FIFA shkon edhe më tej dhe akuzon disa persona për një përpjekje të organizuar për të dëmtuar imazhin e institucionit dhe të presidentit të saj.
“Është gjithnjë e më e qartë se ekziston një përpjekje e koordinuar dhe në vazhdim nga disa persona për të minuar FIFA-n dhe presidentin e saj”, thekson organizata.
FIFA u dërgon një mesazh të drejtpërdrejtë edhe kritikëve të Infantinos.
“Ata që nuk gëzojnë mbështetjen e federatave anëtare të FIFA-s nuk duhet të përpiqen të arrijnë përmes akuzave, aludimeve apo dezinformimit atë që nuk mund ta arrijnë përmes proceseve demokratike të përcaktuara nga FIFA.”
Institucioni kritikon gjithashtu disa prej raportimeve të fundit, duke i cilësuar ato si të pambështetura me prova.
“Raportimet e fundit kanë përfshirë pretendime të pabazuara dhe akuza haptazi të rreme ndaj FIFA-s dhe presidentit të saj. Spekulimet dhe aludimet nuk duhet të paraqiten si fakte. Përsëritja e një akuze nuk e bën atë të vërtetë.”
FIFA mbron edhe figurën e Infantinos duke vënë theksin te karriera e tij e gjatë në futbollin europian dhe botëror.
“Presidenti i FIFA-s i ka kushtuar më shumë se 30 vite të jetës së tij profesionale futbollit europian dhe botëror, duke kontribuar në ndryshime të rëndësishme në këtë sport dhe, në veçanti, në zgjerimin e aksesit, burimeve dhe mundësive në futbollin botëror.”
Sipas FIFA-s, ndryshimet e ndërmarra gjatë drejtimit të Infantinos kanë prekur interesa të konsoliduara në futbollin ndërkombëtar.
“Ndryshimi në mënyrë të pashmangshme sfidon interesa të vendosura, por mosmarrëveshja rreth këtyre ndryshimeve nuk mund të justifikojë përpjekjet për të minuar mandatin demokratik të presidentit të FIFA-s apo vetë institucionin që ai është zgjedhur të drejtojë.”
Pavarësisht toneve të forta, FIFA deklaron se nuk është kundër kritikave apo verifikimit të punës së saj.
“FIFA mirëpret kontrollin legjitim”, thuhet në deklaratë.
Por organizata bën dallimin mes kritikës dhe akuzave që, sipas saj, nuk mbështeten në fakte.
“Kontrolli nuk është një licencë për të shtrembëruar faktet, për të amplifikuar akuza të pabazuara apo për të sajuar shpërqendrime të dizajnuara për të minuar progresin.”
Reagimi i FIFA-s vjen në një periudhë kur po rriten diskutimet për mënyrën se si do të zhvillohet procesi i ardhshëm zgjedhor në krye të organizatës.
Institucioni këmbëngul se çdo proces duhet të zhvillohet brenda kuadrit të përcaktuar nga Statuti i FIFA-s dhe nëpërmjet mekanizmave demokratikë të federatave anëtare.
Mesazhi i FIFA-s është i qartë: zgjedhja e presidentit duhet të vijojë përmes strukturave dhe procedurave zyrtare të organizatës dhe jo përmes presioneve, akuzave apo fushatave jashtë këtij kuadri. Top Channel