Vera është shoqëruar me temperatura përvëluese në shumë vende dhe valët e të nxehtit po zgjasin më shumë se zakonisht. Përveçse e bëjnë të vështirë aktivitetin e përditshëm jashtë, temperaturat ekstreme mund të jenë edhe të rrezikshme për shëndetin. Të moshuarit janë më të rrezikuar, pasi dehidratohen më shpejt gjatë vapës, por edhe personat e tjerë mund të përballen me probleme si ngërçe nga nxehtësia, dehidratim, të fikët apo rraskapitje nga vapa.Lexo edhe:Shkencëtarët zbulojnë pse qimet e imëta të trupit shkaktojnë kruarje Sipas mjekëve, rraskapitja nga nxehtësia shfaqet me etje, lodhje dhe ndonjëherë edhe konfuzion të lehtë. Nëse gjendja përkeqësohet dhe kalon në goditje nga nxehtësia, situata bëhet urgjente: shfaqen çrregullime të vetëdijes, ndryshime të rrahjeve të zemrës dhe të tensionit arterial. Ja cilat janë tetë gjërat që mjekët thonë se nuk do t’i bënin kurrë në ditët shumë të nxehta. 1. Nuk do të shikonin vetëm temperaturën e ajrit Kur temperaturat rriten shumë, nuk mjafton të shohësh vetëm sa gradë tregon termometri. Mjekët këshillojnë të kontrolloni edhe indeksin e nxehtësisë, i cili merr parasysh temperaturën dhe lagështinë, si edhe indeksin e rrezatimit ultraviolet. Shpesh aplikacionet e motit tregojnë edhe temperaturën "e ndier", e cila mund të jetë më e lartë ose më e ulët se temperatura reale për shkak të diellit, lagështisë apo erës. Njohja e kushteve të motit ju ndihmon të planifikoni aktivitetet në mënyrë më të sigurt. 2. Nuk do të prisnin derisa t'i merrte etja Nëse ndieni etje, sipas mjekëve, do të thotë se trupi ka filluar tashmë të dehidratohet. Prandaj është e rëndësishme të pini ujë rregullisht, pa pritur sinjalin e etjes. Nëse djersitni shumë, nuk humbni vetëm ujë, por edhe minerale si natriumi, kaliumi, klori dhe magnezi. Për këtë arsye, në raste aktiviteti të gjatë fizik ose qëndrimi për orë të tëra jashtë, është mirë të zëvendësohen edhe elektrolitet. Shumica e tyre mund të merren përmes ushqimit, por në raste të caktuara mund të ndihmojnë edhe tretësirat me elektrolite. Edhe një përzierje e thjeshtë me ujë, pak kripë dhe pak mjaltë ose sheqer mund të jetë e dobishme. 3. Nuk do ta shuanin etjen me alkool Një birrë e ftohtë ose një koktej mund të duken joshëse në vapë, por mjekët paralajmërojnë se alkooli e përshpejton dehidratimin. Nëse konsumoni alkool, bëjeni me shumë masë dhe mos e përdorni si zëvendësues të ujit. 4. Nuk do të qëndronin jashtë në orët më të nxehta Periudha nga mesdita deri rreth orës 14:00–15:00 është zakonisht më e nxehta e ditës. Punët në oborr, aktiviteti fizik apo shëtitjet është më mirë të planifikohen herët në mëngjes ose në mbrëmje, kur temperaturat janë më të ulëta. 5. Nuk do të rrinin gjatë në diell pa pushime Nëse duhet të qëndroni jashtë, për shembull për shkak të punës apo një aktiviteti, është e rëndësishme të bëni pushime të shpeshta. Kërkoni hije, futuni në ambiente të freskëta ose me ajër të kondicionuar sa herë që të jetë e mundur. Edhe pak minuta larg diellit mund të ndihmojnë trupin të ulë temperaturën. 6. Nuk do të harronin mbrojtjen nga insektet Kur dilni në natyrë, nuk duhet të mendoni vetëm për diellin. Në zona me bar apo pyje ekziston rreziku nga rriqrat, ndërsa pranë ujit zakonisht ka shumë mushkonja. Mjekët rekomandojnë përdorimin e preparateve kundër rriqrave në rroba dhe të sprejeve kundër mushkonjave për të ulur rrezikun e pickimeve dhe sëmundjeve që ato mund të transmetojnë. 7. Nuk do të dilnin pa krem mbrojtës Kremi kundër diellit duhet përdorur çdo ditë, por sidomos gjatë ditëve me temperatura të larta dhe rrezatim të fortë. Dermatologët rekomandojnë produkte me mbrojtje ndaj rrezeve UVA dhe UVB dhe me faktor mbrojtës të paktën 30. Një kapele me strehë është gjithashtu një mbrojtje e mirë shtesë. 8. Nuk do të injoronin ndikimin e ilaçeve në vapë Disa ilaçe mund ta bëjnë organizmin më të ndjeshëm ndaj temperaturave të larta ose ndaj diellit. Ndër to përfshihen disa antidepresivë, antihistaminikë, ilaçe për tensionin e gjakut dhe disa barna për çrregullime psikiatrike. Këto mund të ndikojnë në aftësinë e trupit për të rregulluar temperaturën dhe djersitjen, duke rritur rrezikun për dehidratim dhe goditje nga nxehtësia. Gjithashtu, disa antibiotikë, diuretikë, barna kundër inflamacionit si ibuprofeni dhe disa terapi hormonale mund ta bëjnë lëkurën më të ndjeshme ndaj diellit, duke rritur rrezikun e djegieve. Nëse merrni ilaçe rregullisht, është mirë të konsultoheni me mjekun ose farmacistin për të kuptuar nëse ato ndikojnë në tolerancën ndaj vapës.
