Gjashtë muajt e parë të vitit 2026 kanë sjellë një rritje alarmante të ekspozimit të fëmijëve ndaj temperaturave ekstreme. Sipas organizatës për të drejtat e fëmijëve “Save the Children”, numri i fëmijëve të prekur në vetëm gjysmën e parë të këtij viti është tre herë më i lartë se gjatë gjithë vitit 2025. Rreth dy të tretat e fëmijëve në Europën Perëndimore janë ekspozuar ndaj valëve ekstreme të të nxehtit gjatë gjashtë muajve e gjysmë të parë të vitit 2026, duke shënuar nivelin më të lartë që prej vitit 2003. Në Gjermani, numri i fëmijëve të ekspozuar ndaj temperaturave ekstreme në gjashtë muajt e parë të këtij viti ishte më i lartë se në pesë vitet e mëparshme të marra së bashku. Në Mbretërinë e Bashkuar, rreth 10 milionë fëmijë u përballën me temperatura ekstreme gjatë kësaj periudhe, më shumë se në çdo vit të vetëm gjatë tre dekadave të fundit. Fëmijët janë veçanërisht të rrezikuar nga i nxehti, pasi organizmi i tyre është ende në zhvillim dhe e ka më të vështirë të rregullojë temperaturën e trupit. Kjo i ekspozon ndaj rrezikut për çrregullime të ekuilibrit të lëngjeve, temperaturë të lartë, sëmundje të frymëmarrjes dhe probleme me veshkat. Ndikimet shtrihen edhe në arsim. Në Francë dhe në Britani, disa shkolla u mbyllën në muajin qershor për të mbrojtur fëmijët nga temperaturat e rrezikshme. Organizata paralajmëron se të dhënat për gjithë vitin pritet të jenë edhe më shqetësuese, pasi shifrat aktuale përfshijnë edhe muajt më të freskët të dimrit dhe pranverës. Ekspertët kërkojnë masa më të shpejta për klimën, përfshirë kalimin nga lëndët djegëse fosile te energjia e rinovueshme. Sipas “Save the Children”, kufizimi i ngrohjes globale në 1.5 gradë Celsius mund të shpëtojë miliona fëmijë nga ekspozimi i jashtëzakonshëm ndaj temperaturave ekstreme gjatë jetës së tyre.
