Zjarri masiv që përfshiu mbrëmjen e djeshme territorin e Bashkisë Himarë vijon të jetë aktiv, ndërsa mëngjesin e sotëm ka nisur ndërhyrja nga ajri. Helikopterët po hedhin ujë mbi vatrat aktive, në përpjekje për të frenuar përhapjen e flakëve dhe për të izoluar zonat e prekura.
Prefektja e Qarkut Vlorë, Evis Alushi, deklaroi se situata është përmirësuar gjatë orëve të para të mëngjesit dhe aktualisht konsiderohet nën kontroll. Sipas saj, gjatë natës ka pasur rrezik në zonën e Potamit, ndërsa tani nuk ka rrezik për zonat e banuara. Operacioni është përqendruar në kodrën e Pilurit, ku vijon beteja me flakët.
Nga zjarri janë prekur gjashtë banesa, tre prej të cilave të banuara dhe tre të pabanuara. Si masë parandaluese, 36 persona janë evakuuar, ndërsa forcat në terren dhe ekipet nga ajri vijojnë operacionin për shuarjen e plotë të vatrave të zjarrit.