Pas tre dekadash nga një prej ngjarjeve më të bujshme në historinë e muzikës botërore, gjyqi për vrasjen e reperit legjendar Tupac Shakur po i afrohet fundit. Prokurorët dhe avokatët mbrojtës paraqitën këtë të hënë deklaratat e tyre përfundimtare përpara jurisë në Gjykatën e Qarkut Clark në Las Vegas, ku i pandehuri 63-vjeçar Duane “Keffe D” Davis përballet me dënim me burgim të përjetshëm.
Davis, një ish-drejtues i bandës South Side Compton Crips, akuzohet për orkestrimin e të shtënave nga makina më 7 shtator 1996, furnizimin me armë dhe ndihmën në kryerjen e vrasjes, ndonëse nuk pretendohet se ai vetë ka tërhequr këmbëzën.
Prokuroria: Davis e ka pranuar përgjegjësinë vazhdimisht
Zëvendësprokurori i Qarkut, Binu Palal, u kërkoi anëtarëve të jurisë ta shpallin Davisin fajtor për vrasje të shkallës së parë, duke argumentuar se i pandehuri “e ka pasur të pamundur të heshtë” gjatë viteve dhe ka përfituar financiarisht nga tregimi i historisë.
Prokuroria mbështeti pretendimet e saj në katër deklarata kyçe të dhëna prej tij ndër vite:
Intervistat federale me forcat e rendit në vitet 2008 dhe 2009;
Intervista e vitit 2017 për dokumentarin Death Row Chronicles;
Libri autobiografik i vitit 2019, “Compton Street Legend”.
Sipas prokurorit Palal, të shtënat ndodhën si hakmarrje pasi Tupac Shakur dhe pjesëtarë të bandës Mob Piru rrahën nipin e Davis, Orlando “Baby Lane” Anderson, në një kazino në Las Vegas pak orë para incidentit. Prokuroria theksoi se Davis ka dhënë detaje që vetëm një pjesëmarrës në vendngjarje mund t’i dinte.
Mbrojtja: Mos ngatërroni faktet me trillimet e librit
Nga ana tjetër, avokati mbrojtës Michael Sanft argumentoi se çështja e prokurorisë mbështetet në “trillime, mburrje të rreme dhe fakte të pakompletuara”, ndërsa i kërkoi jurisë të mos konfondojë dëshmitë me pretendimet komerciale të librit.
Sanft e krahasoi çështjen me filmin Titanic.
“Një fakt historik është se Titaniku u fs në det. Por nuk ka asnjë provë që personazhet Jack dhe Rose kanë ekzistuar me të vërtetë. Mos supozoni asgjë, kërkoni faktet që mbështesin deklaratat”, u shpreh avokati mbrojtës.
Mbrojtja vuri në dyshim besueshmërinë e hetimit të Policisë së Las Vegasit dhe LAPD-së, duke theksuar mungesën e provave fizike që lidhin drejtpërdrejt Davisin me krimin, mospërputhjet në dëshmitë e dëshmitarëve pamorë dhe degradimin e kujtesës pas tre dekadash.
Përmbledhje e zhvillimeve kryesore të seancës
Vendimi i jurisë, paneli përbëhet nga 16 anëtarë, nga të cilët 12 do të tërhiqen për të marrë vendimin përfundimtar mbi fajësinë ose pafajësinë e Davis.Prania e familjes, vëllai dhe motra e Shakurit, Mopreme dhe Sekyiwa Shakur, ndoqën seancën në rreshtin e parë të sallës së gjyqit.Tre personat e tjerë që ndodheshin në automjetin e bardhë Cadillac natën e vrasjes – përfshirë ekzekutorin e dyshuar Orlando Anderson – kanë ndërruar jetë gjatë dekadave të fundit.Gjyqtarja e çështjes, Carli Kierny, udhëzoi jurinë mbi dallimet ligjore mes vrasjes së shkallës së parë dhe të dytë, përpara se anëtarët të tërhiqeshin për vendim.
Sfondi mbi të cilin po zhvillohet gjyqi
Duane “Keffe D” Davis, 63 vjeç, akuzohet si organizatori i vrasjes së reperit legjendar Tupac Shakur, ngjarje e ndodhur më 7 shtator të vitit 1996. Ai po gjykohet në Las Vegas – qyteti ku u krye krimi – nën akuzën e vrasjes me armë vdekjeprurëse, kryer me qëllim favorizimin dhe ndihmën ndaj një organizate kriminale. Ndonëse Davis është deklaruar i pafajshëm, nëse shpallet fajtor, ai rrezikon të përballet me dënimin me burgim të përjetshëm.Natën e ngjarjes fatale, Shakur po udhëtonte në një automjet tip BMW, i shoqëruar nga manjati i industrisë muzikore, Marion “Suge” Knight. Gjatë pritjes në një semafor të kuq, një Cadillac i bardhë u ndal përbri tyre. Shakur u qëllua me breshëri armësh dhe humbi jetën gjashtë ditë më vonë, ndërsa Knight arriti të mbijetojë. Zanafilla e këtij atentati mendohet të jetë një përplasje e vjetër dhe e ashpër mes bandave rivale: Mob Piru Bloods, me të cilën kishin lidhje Shakur dhe Knight, dhe South Side Compton Crips, ku Davis shërbente si një prej drejtuesve kryesorë. Çështja mbeti e pazbardhur për një kohë të gjatë, derisa një seri intervistash të vetë Davisit dhe publikimi i kujtimeve të tij autobiografike në vitin 2019, rihapën dosjen duke zbuluar detaje tronditëse.Prokuroria e ka mbështetur akuzën kryesisht mbi vetë deklaratat publike të Davisit. Sipas tyre, ai orkestroi atentatin si shenjë hakmarrjeje, pasi Shakur dhe shoqëruesit e tij kishin rrahur nipin e tij, Orlando “Baby Lane” Anderson, vetëm pak orë përpara të shtënave. Nga ana tjetër, mbrojtja i konsideron këto deklarata si “trillime” dhe thekson me forcë mungesën e provave fizike që lidhin drejtpërdrejt të pandehurin me vendin e krimit. Gjatë procesit gjyqësor, juria ka dëgjuar dëshmitë e mbi 20 personave, të gërshetuara me intervista dhe regjistrime audio që shtrihen përgjatë tri dekadave.