Nëna e 20-vjeçarit Joan Zuko i cili u vra nga Kristjan Sterjo ka ndarë një mesazh të ndjerë për të birin. Nëna, Ornela Zuko ndër të tjera ka bërë me dije se ceremonia mortore do të zhvillohet më 11 gusht të martën në orën 12:00. “Me zemrën e copëtuar dhe me dhimbjen më të madhe që mund të mbajë shpirti i një nëne, ne pamundesi per t ju pergjigjur te gjitheve ju njoftojmë se më 11 gusht, në orën 12:00, do t’i japim lamtumirën e fundit birit tim të vogël, dritës së syve të mamit. Biri im, ti do të mbetesh përjetësisht fryma ime, dashuria ime më e madhe dhe pjesa më e shtrenjtë e zemrës sime. Mami nuk do të të harrojë kurrë dhe do të të mbajë brenda shpirtit deri në frymën e fundit.U prehsh në paqe, engjëlli i mamit”, thuhet në mesazhin e nënës së të riut. Ngjarja e rëndë ndodhi dy ditë më parë rreth orës 16:30, në lagjen nr. 15, në rrugën “Viktor Eftimiu” në Korçë. Joan Zuko është përpjekur t’i shpëtojë autorit të krimit duke vrapuar dhe ka hyrë në një ndërtesë. Kristjan Sterjo dyshohet se e ka ndjekur atë në ambientet e ndërtesës dhe e ka qëlluar nga pas, teksa 20-vjeçari po ngjitej shkallëve. Zuko fatkeqësisht nuk arriti t’iu mbijetonte plagëve teksa autori u kap pas disa orësh kërkimesh.
