Zëvendëspresidenti amerikan JD Vance ka refuzuar të deklarojë nëse mbështet kryeministrin izraelit Benjamin Netanyahu për një mandat të ri, pavarësisht se Presidenti Donald Trump së fundmi i ka dhënë mbështetjen e tij të plotë liderit izraelit. Në një intervistë me gazetarin Mark Halperin, të zhvilluar në bordin e Air Force Two, Vance u shpreh se fokusi i tij është te politika amerikane dhe zgjedhjet e mesmandatit.
“Unë mbështes kandidatët amerikanë. Aty është fokusi im, te zgjedhjet e mesmandatit. Nuk po përfshihem në zgjedhjet izraelite”, deklaroi Vance.
I pyetur nëse ishte pro apo kundër një mbështetjeje për Netanyahun, zëvendëspresidenti amerikan u përgjigj: “Nuk jam kundër mbështetjes së tij, por as nuk jam pro. Nuk po përfshihem në zgjedhjet izraelite.”
Qëndrimi i Vance vjen në një moment kur zgjedhjet në Izrael janë vetëm pak ditë larg dhe duket se ndryshon nga qasja e Presidentit Trump. Ky i fundit, pas një periudhe hezitimi, i dha të shtunën mbështetjen e tij të fuqishme Netanyahut, duke e cilësuar atë në një postim në rrjetet sociale si një “kryeministër luftëtar të madh”.
Vance ishte shprehur më herët se nuk dëshironte të përfshihej në politikën izraelite, ndërsa Trump kishte thënë gjithashtu më parë se nuk ishte i përfshirë në politikën e vendit.
Megjithatë, qëndrimi i zëvendëspresidentit ka ngritur pikëpyetje, pasi në fillim të këtij viti ai udhëtoi drejt Budapestit për të mbështetur Viktor Orbán, kandidatin e mbështetur nga Trump në zgjedhjet hungareze. Orbán, kryeministër prej një kohe të gjatë, humbi zgjedhjet.
Ndërkohë, në një zhvillim tjetër, Sekretari amerikan i Mbrojtjes Pete Hegseth zhvilloi të hënën një vizitë të paparalajmëruar në Izrael, ku u takua me kryeministrin Netanyahu dhe ministrin izraelit të Mbrojtjes, Israel Katz.
Vizita dhe deklaratat e Vance vijnë në një periudhë të ndjeshme për marrëdhëniet SHBA-Izrael, vetëm pak ditë përpara zgjedhjeve izraelite. Top Channel