Presidenti ukrainas Volodymyr Zelensky ka nisur një riorganizim të gjerë të qeverisë, duke propozuar zyrtarisht Serhiy Koretsky, drejtorin ekzekutiv të kompanisë shtetërore të energjisë Naftogaz, për postin e kryeministrit të ri të vendit. Dokumentacioni përkatës i është dorëzuar Verkhovna Rada-s, parlamentit ukrainas, ndërsa kryetari i tij, Ruslan Stefanchuk, bëri të ditur se kandidatura do të shqyrtohet menjëherë sipas procedurave parlamentare. Sipas mediave ukrainase, parlamenti pritet të votojë të enjten jo vetëm për kryeministrin e ri, por edhe për përbërjen e kabinetit të ri qeveritar.
Duke folur në Kiev, në prani të Presidentes së Komisionit Evropian, Ursula von der Leyen, Zelensky u shpreh se, pas konsultimeve të zhvilluara, Koretsky është “ndoshta personi më i përshtatshëm” për të drejtuar qeverinë.
Kreu i shtetit ukrainas theksoi se prioritetet kryesore të kabinetit të ri do të jenë përgatitja e vendit për dimrin, garantimi i furnizimit me energji dhe intensifikimi i përpjekjeve për arritjen e një armëpushimi.
Riorganizimi pritet të prekë edhe disa ministri kyçe. Sipas raportimeve, ambasadori i Ukrainës në Bashkimin Evropian, Vsevolod Chentsov, pritet të emërohet zëvendëskryeministër për integrimin evropian dhe euroatlantik, ndërsa po shqyrtohen edhe ndryshime në Ministrinë e Çështjeve të Veteranëve.
Ndryshime priten edhe në Ministrinë e Mbrojtjes. Mediat ukrainase raportojnë se ministri aktual Mikhail Fedorov mund të zëvendësohet nga ministri i Brendshëm, Ihor Klimenko. Fedorov u largua nga qeveria të mërkurën, vetëm gjashtë muaj pasi kishte marrë detyrën, në kuadër të riorganizimit të nisur nga Zelensky. Sipas raportimeve, largimi i tij lidhet me mosmarrëveshje të brendshme për drejtimin e operacioneve ushtarake dhe me vonesat në reformën e sistemit të rekrutimit.
Riorganizimi i qeverisë erdhi pas dorëheqjes së kryeministres Yulia Sviridenko, e cila u miratua nga Verkhovna Rada me 258 vota pro, vendim që solli automatikisht dorëheqjen e të gjithë kabinetit.
Në fjalimin e saj të fundit në parlament, Sviridenko e cilësoi si arritjen më të rëndësishme të mandatit të saj sigurimin e një pakete financimi prej 90 miliardë eurosh nga Bashkimi Evropian, e cila, sipas saj, garanton stabilitetin financiar të Ukrainës për këtë dhe vitin e ardhshëm. Ajo kishte luajtur gjithashtu një rol të rëndësishëm në negociatat me Shtetet e Bashkuara për zhvillimin e burimeve minerale të Ukrainës.
Sipas mediave ukrainase, Zelensky kishte shqyrtuar mundësinë e emërimit të Sviridenkos si ambasadore të Ukrainës në Uashington, por ajo thuhet se e kishte refuzuar këtë propozim. Top Channel