Autori i sulmit të armatosur që la pas 6 viktima dhe 15 të plagosur në Krakov, ka ndërruar jetë mëngjesin e sotëm në spital. Ai ishte plagosur nga një polic që e neutralizoi pasi hapi zjarr ndaj qytetarëve dhe ndodhej në gjendje të rëndë. Autoritetet kanë konfirmuar identitetin e tij: Michal Oksinski, 24 vjeç, me profesion tornitor. Ai kishte studiuar për mekanik në një shkollë profesionale. LEXO edhe...Sulmi me armë në Krakov, momenti kur 25-vjeçari hap zjarr nga makina, qytetarët vrapojnë në panik! Para sulmit autori kishte vrarë në banesë prindërit e motrën (VIDEO) Sipas dëshmive të transmetuara nga radioja lokale Eska, që në moshë të re ai kishte vështirësi në krijimin e marrëdhënieve shoqërore. Ish-shokët e shkollës kanë treguar se gjatë orëve të mësimit ai vizatonte shpesh njerëz të varur në litar ose të armatosur gjatë një sulmi. “Kur e pyesnim për shpjegime, ai përgjigjej se bëhej fjalë për një sulm në një shkollë dhe se ai ishte sulmuesi”, ka treguar një grua. Ajo ka shtuar se Michal tregonte vëmendje gjatë mësimit vetëm kur tema lidhej me historinë. Sipas autoriteteve, ai nuk kishte precedentë penalë dhe zotëronte leje për armën. Fillimisht u përhap lajmi se gjatë sulmit ai kishte përdorur armë luftarake, sipas deklaratës së një zëdhënësi të policisë: “Disa armë dhe municione u gjetën në makinën e tij të braktisur në kryqëzimin e rrugëve Dietla dhe Stradomska”. Këto informacione kishin bërë që fillimisht të besohej se personi kishte lidhje me forcat e armatosura, në një vend ku të shtënat me armë janë shumë të rralla dhe legjislacioni për posedimin e armëve është mjaft i rreptë. Megjithatë, lajmet se bëhej fjalë për një ushtarak u përgënjeshtruan që mbrëmjen e djeshme nga qeveria e Varshavës. Oksinski kishte udhëtuar me makinë për rreth 150 kilometra deri në Krakov, nga banesa e tij në Ostrowiec Świętokrzyski, një qytet me 75 mijë banorë, i vendosur përgjatë lumit Kamienna, me një të kaluar të lidhur me industrinë metalurgjike. Qyteti njihet si një nga vendbanimet më të ndriçuara të vendit. Në shtëpinë e tij, policia gjeti vetëm errësirë dhe vdekje: tre persona të pajetë, familjarët më të afërt të tij. Bëhet fjalë për babanë 53-vjeçar, nënën 52-vjeçare dhe motrën 21-vjeçare. Ata patën të njëjtin fat tragjik si katër gratë dhe dy burrat që humbën jetën në Sheshin e Tregut në Krakov. Katër prej viktimave ishin polakë, një britanik dhe një austriake. Mes 15 të plagosurve, pesë prej të cilëve shtetas të huaj nga vende të ndryshme (Austria, Gjermania, Rusia, Ukraina dhe Portugalia), të shtruar në Spitalin Universitar të Krakovit, ndodheshin edhe dy policë, Jakub Kulik dhe Artur Moranski. Ata ndërhynë vetëm tre minuta pas të shtënave të para, duke u përpjekur të ndalonin autorin e sulmit. Njëri prej tyre ndodhet në gjendje shumë kritike, pasi u qëllua tri herë teksa përpiqej të neutralizonte 24-vjeçarin. Ngjarja dokumentohet edhe në një video tronditëse, ku shihet sulmuesi i shtrirë në tokë dhe efektivi i policisë sipër tij, duke u përpjekur ta mbajë nën kontroll, përpara se të rrëzohet pasi goditet nga plumbat. Sipas rindërtimit paraprak të ngjarjes, autori nisi të qëllonte me armë brenda makinës së tij, ndërsa mbërriti në shesh nga rruga Sławkowska, i veshur me uniformë kamuflazhi të stilit ushtarak. Informacionet për profilin e tij janë ende të pamjaftueshme për të krijuar një portret të plotë. Ministri i Brendshëm, Marcin Kierwinski, deklaroi mbrëmjen e djeshme gjatë një konference për shtyp se hetimet paraprake tregojnë se bëhet fjalë për një “ultranacionalist”, të frymëzuar nga “ideologjitë e ekstremit të djathtë”, megjithëse këto informacione “duhet ende të verifikohen plotësisht”. Një nga hipotezat që po shqyrtojnë hetuesit është mundësia që ai të jetë radikalizuar përmes internetit. Dëshmia e një tjetër ish-shoku të shkollës, e transmetuar edhe nga mediat ndërkombëtare, pasqyron tronditjen e dikujt që nuk arrin ta kuptojë atë që ndodhi në Sheshin e Tregut. “Ishte një djalë i qetë. Mendoja se kishte filluar studimet në universitet”, ka treguar i riu. Sipas mediave polake, Michal ishte bashkëpronar i një poligoni qitjeje së bashku me të atin. “Shpesh të dielave, ndërsa merresha me punët e kuzhinës, shihja babanë dhe djalin të hipnin në makinë, të veshur me uniforma kamuflazhi dhe me çanta të mëdha me vete”, i ka treguar gazetarëve një fqinj i familjes, cituar nga TVN24. Babai zotëronte dhjetë armë zjarri, ndërsa edhe djali kishte armët e tij. Katër prej tyre i kishte me vete ditën e sulmit. Në Poloni, një vend me 37 milionë banorë, 411 mijë persona zotërojnë leje të rregullt për mbajtjen e armëve. Sipas mediave, interesi për armët po rritet. Hetuesit do të shqyrtojnë me imtësi jetën e autorit të sulmit, përfshirë edhe pasionin e tij për sulmet ndaj shkollave, të cilin e kishte shfaqur që në fëmijëri përmes vizatimeve. P.J/ReportTv.al poloni krakove sulm me arme Michal Oksinski Komento Komente Sondazhi i ditës: Cilin mbështesni në përplasjen politike që u hap? Ramën 48.2% Veliajn 17.2% Asnjërin 34.6% Vota total: 2163 Sondazhi i ditës: Cilin mbështesni në përplasjen politike që u hap?
