Juan Cuadrado është rikthyer te një nga vendimet më të diskutueshme të karrierës së tij, kalimi nga Juventusi te Interi në vitin 2023. Në një intervistë për Tuttosport, futbollisti kolumbian ka pranuar se në atë kohë nuk e kishte kuptuar plotësisht peshën e rivalitetit mes dy klubeve dhe se largimi nga Torino la pas zhgënjim te tifozët bardhezinj.
Anësori, i cili tashmë është 38 vjeç dhe aktivizohet në Kolumbi me Millonarios, tregoi se trajneri Massimiliano Allegri dëshironte ta mbante në skuadër dhe se mes tyre ishte arritur edhe një marrëveshje verbale për vazhdimin e bashkëpunimit.
“Allegri do të më kishte mbajtur, madje kishim arritur një marrëveshje me fjalë, por nuk më pëlqeu mënyra se si u realizua largimi. U zhgënjeva, sepse shkova te Interi dhe në atë kohë nuk e kuptova sa i fortë ishte rivaliteti mes dy skuadrave. Doja vetëm të luaja. Kur je futbollist aktiv, nuk mendon shumë për këto gjëra”, u shpreh Cuadrado.
Kolumbiani pranoi se vetëm pasi iu bashkua zikaltërve kuptoi reagimin që vendimi i tij kishte shkaktuar te tifozët e Juventusit.
“Kur shkova te Interi, kuptova se kisha lënduar gjithë botën bardhezi, edhe pse pa dashje. Do të kisha qëndruar te Juventusi, nuk doja të lëndoja askënd”, rrëfeu ai.
Në fund, Cuadrado shprehu dëshirën që me kalimin e kohës tifozët e Juventusit ta kuptojnë më mirë zgjedhjen e tij, duke pranuar se ndihet në njëfarë mënyre borxhli ndaj tyre.
“Shpresoj që me kalimin e kohës njerëzit ta rishqyrtojnë qëndrimin e tyre ndaj meje. Ndihem sikur duhet t’u kërkoj falje tifozëve që i kam zhgënjyer. Shpresoj të më kuptojnë dhe të mos mbajnë mëri ndaj meje”, përfi futbollisti kolumbian.
Kalimi i Cuadrado-s te Interi në verën e vitit 2023, pas tetë sezonesh me fanellën e Juventusit, ishte pritur me reagime të forta nga tifozët bardhezinj, për shkak të rivalitetit historik mes dy klubeve. Top Channel