Vdekja e Asllan Gjanës pas një përplasjeje gjatë ndeshjes ka nxitur kontrolle të menjëhershme për sigurinë në impiantet sportive në zonën e Kavalës. Vdekja tragjike e 16-vjeçarit me origjinë shqiptare, Asllan Gjana, ka sjellë masa të menjëhershme në Greqinë veriore. Bashkia e Pangeut, në prefekturën e Kavalës, ka pezulluar lejet e përkohshme të funksionimit për 11 fusha futbolli, deri në përfundimin e kontrolleve për sigurinë e tyre.
Ngjarja që tronditi futbollin
Gjana, i njohur nga të afërmit dhe shokët si “Ani”, po luante për Byronas Kavala ndaj Aiandas Panagias, në një ndeshje të kategorisë së dytë në ishullin Thasos. Në minutën e dytë, gjatë një dyluftimi për topin, ai doli jashtë fushës dhe goditi kokën në një strukturë të fortë pranë zonës së lojës. Pasi humbi ndjenjat, u transportua në Spitalin e Kavalës dhe u shtrua në kujdes intensiv, por nuk arriti të mbijetonte.
Kontrolle për 11 fusha futbolli
Vendimi i Bashkisë së Pangeut parashikon verifikimin e dimensioneve të fushave dhe të distancave të sigurisë nga muret, tribunat dhe pengesat e tjera fikse. Lejet do të mbeten të pezulluara deri në përfundimin e kontrolleve. Masa prek fushat në Agios Andreas, Akrovouni, Amisiana, Elaiochori, Eleftheres, Kokkinochoma, Melissa, Nea Peramos, Nikisiani, Palaiochori, si dhe fushën e Shoqatës së Futbollit të Kavalës në Amisiana. Ndërkohë, policia e Thasos, në bashkëpunim me Prokurorinë e Kavalës, po heton rrethanat e ngjarjes tragjike. Top Channel