Një tornado e fuqishme ka goditur bregdetin perëndimor të Siçilisë, në Itali, duke shkaktuar dëme të mëdha materiale dhe duke lënë disa persona të plagosur, mes tyre edhe fëmijë.
Fenomeni ekstrem përfshiu zonën e Marsalës, ku erërat e forta përmbysën automjete, dëmtuan ndërtesa dhe shkaktuan kaos në rrugë. Pamjet që po qarkullojnë në rrjetet sociale tregojnë një vorbull gjigante pluhuri dhe mbeturinash që lëviz përgjatë vijës bregdetare, duke ngritur objekte në ajër dhe duke përmbysur makina.
Sipas mediave lokale, dy persona mbetën të plagosur rëndë pasi automjeti me të cilin udhëtonin u përmbys në një përrua nga fuqia e erës. Gjendja e tyre shëndetësore nuk është bërë ende plotësisht e qartë.
Pasojat e motit ekstrem u ndien edhe në shkollën “Alcide De Gasperi”, në zonën e Strasattit, ku disa fëmijë u plagosën gjatë orës së mësimit. Një vorbull e dyfishtë ere përfshiu ndërtesën, duke përmbysur raftet e librave dhe duke thyer dritaret, siç raporton gazeta “La Sicilia”.
Ngjarja shkaktoi panik mes nxënësve dhe stafit të shkollës, ndërsa shërbimet e emergjencës mbërritën për t'u ardhur në ndihmë të plagosurve. Lëndimet e raportuara në shkollë nuk konsiderohen kërcënuese për jetën, por një djalë u transportua me urgjencë në spital.
Dëme të konsiderueshme janë raportuar edhe në ndërtesa të tjera, ku erërat shkatërruan çati dhe shpërndanë mbeturina nëpër rrugë. Fotot nga zona tregojnë automjete të përmbysura dhe re të dendura pluhuri që mbuluan pjesë të bregdetit.
Stuhitë dhe shirat e rrëmbyeshëm kanë përfshirë rajonin për disa orë, veçanërisht zonën e Trapanit dhe bregdetin e Tirrenit, duke përkeqësuar ndjeshëm kushtet atmosferike.