Shtetet e Bashkuara kanë njoftuar një paketë ndihme prej 15.5 milionë dollarësh për Kolumbinë, pas tërmetit të fuqishëm që goditi vendin e Amerikës së Jugut, duke shkaktuar më shumë se 130 viktima dhe dhjetëra të plagosur. Administrata e presidentit amerikan Donald Trump deklaroi se fondet do të përdoren për të siguruar tenda, ushqime, pajisje mbrojtëse dhe mbështetje për vlerësimin e dëmeve të shkaktuara nga tërmeti.
Departamenti amerikan i Shtetit e përshkroi tërmetin si “katastrofik”, ndërsa njoftoi se Shtetet e Bashkuara po monitorojnë nga afër situatën dhe janë të gatshme të mbështesin autoritetet kolumbiane.
Mbi 132 viktima dhe dhjetëra të plagosur
Bilanci i tërmetit vijon të rritet. Sipas të dhënave më të fundit, të paktën 130 persona kanë humbur jetën dhe 500 të tjerë janë plagosur.
Ekipet e kërkim-shpëtimit vijojnë operacionet në zonat më të prekura, ndërsa autoritetet kanë paralajmëruar se bilanci mund të ndryshojë, pasi dyshohet se persona të tjerë mund të jenë ende të bllokuar nën rrënoja.
Pereira dhe qytete të tjera në Kolumbinë perëndimore janë ndër zonat më të goditura. Dëme të shumta janë raportuar në ndërtesa, infrastrukturë rrugore, spitale dhe aeroporte. Top Channel