Pavarësisht propozimit për një takim trepalësh mes Donald Trump, Vladimir Putin dhe Volodymyr Zelensky për të rikthyer negociatat për përfundimin e luftës në Ukrainë, nga Moska vijnë sinjale që tregojnë se rruga drejt një takimi të tillë mbetet e vështirë. Zëdhënësi i Kremlinit, Dmitry Peskov, deklaroi se një takim mes tre liderëve do të kishte kuptim vetëm nëse do të shërbente për formalizimin e marrëveshjeve të arritura më herët.
Sipas Peskov, nuk do të kishte kuptim që një takim i tillë të përdorej për diskutime të reja mbi detajet e marrëveshjeve, pasi, sipas tij, Kievi nuk është i gatshëm të angazhohet për një zgjidhje të qëndrueshme.
Qëndrimi i Moskës vjen në një moment kur po shtohen përpjekjet diplomatike për të rikthyer Rusinë dhe Ukrainën në tryezën e negociatave, me administratën amerikane që kërkon një rrugë drejt përfundimit të konfliktit.
Ndërkohë, Rusia ka paralajmëruar edhe për një përshkallëzim të mundshëm në terren.
Sipas zyrtarëve të lartë të Kremlinit, të cituar nga agjencia ruse TASS, Moska po përgatitet për “sulme masive” ndaj objekteve energjetike ukrainase.
Këto sulme, sipas pretendimeve ruse, do të ishin përgjigje ndaj goditjeve të kryera nga Ukraina kundër objektivave civile në Rusi. Top Channel