Një projekt futurist që synon të krijojë një komunitet të ri për sipërmarrës, investitorë dhe profesionistë të teknologjisë po merr formë në Uruguay, në brigjet e Río de la Plata.
Bëhet fjalë për Praxis, një komunitet teknologjik amerikan i drejtuar nga 30-vjeçari Dryden Brown, i cili ka zgjedhur kompleksin urbanistik +Colonia, pranë qytetit historik Colonia del Sacramento, për të zhvilluar projektin e tij të parë fizik në shkallë qyteti.
Sipas The New York Times, të cituar edhe nga media të tjera ndërkombëtare, Brown dhe ekipi i tij e konceptojnë Praxis si një eksperiment për mënyrën se si njerëzit mund të jetojnë në një botë ku inteligjenca artificiale do të ndryshojë rrënjësisht punën, ekonominë dhe mënyrën e organizimit të shoqërisë.
Praxis ka deklaruar se synon të mobilizojë rreth 1 miliard dollarë investime gjatë tre viteve të ardhshme, ndërsa banorët e parë pritet të mbërrijnë në mesin e vitit 2027. Investimi do të përfshijë banesa, struktura mikpritjeje, hapësira kulturore dhe zona për punë e aktivitete krijuese. Por bëhet fjalë ende për një projekt në fazat e para. Sipas Forbes Uruguay, blerja e tokës për pjesën e Praxis nuk është finalizuar ende dhe transaksionet e para priten gjatë vitit 2027. Marrëveshja me +Colonia është gjithashtu në një fazë fillestare. Praxis pretendon se komuniteti i saj online përfshin më shumë se 150 mijë persona në të gjithë botën. Nga këta, rreth 2,700 persona kanë shprehur interes për t’u zhvendosur dhe investuar në projektin në Uruguay. Projekti do të zhvillohet brenda +Colonia, një kompleks i madh urbanistik në brigjet e Río de la Plata, i promovuar nga sipërmarrësi argjentinas Eduardo Bastitta. Zona është tashmë në zhvillim dhe disa ndërtesa janë në ndërtim, ndërsa projekti i përgjithshëm synon të kombinojë banimin, biznesin, teknologjinë, hotelerinë dhe hapësirat e gjelbra. Bastitta është gjithashtu këshilltar i presidentit argjentinas Javier Milei, një lidhje që është përmendur në raportimet ndërkombëtare për projektin. Sipas Praxis, zgjedhja e Uruguay-t lidhet me stabilitetin politik dhe ekonomik, institucionet demokratike dhe pozicionin gjeografik, ndërsa vendndodhja e +Colonia e vendos projektin vetëm rreth një orë me traget nga Buenos Airesi. Presidenti uruguaian Yamandú Orsi është takuar me Dryden Brown në Nju Jork, ndërsa projekti është prezantuar si një investim i rëndësishëm për vendin. Megjithatë, mediat uruguaiane kanë theksuar se marrëveshja është ende në fazë të hershme dhe se pjesa më e madhe e investimit është një vlerësim i planifikuar, jo kapital që është investuar tashmë. Ideja e Brown shkon përtej ndërtimit të një kompleksi rezidencial. Praxis e paraqet projektin si një eksperiment për mënyrën se si mund të organizohet jeta në një epokë ku inteligjenca artificiale pritet të transformojë tregun e punës dhe ekonominë.
Vizioni arkitektonik ndërthur elemente të frymëzuara nga qytetërimet klasike me elemente futuriste. Brown ka folur më parë për një kombinim të arkitekturës gotike dhe futurizmit hapësinor, ndërsa Praxis e lidh projektin me kulturën, artin dhe mënyra të reja të organizimit ekonomik. Sipas kompanisë, një pjesë e të ardhurave nga shitja e banesave do të përdoret gjithashtu për programe kulturore, artistë dhe rezidenca krijuese.
Megjithatë, qyteti futurist është ende larg të qenit realitet i përfunduar. Toka për pjesën e Praxis nuk është blerë ende, ndërtimi specifik i qytetit sapo është në fazën e planifikimit dhe banorët e parë parashikohen për vitin 2027. Burimi: The New York Times